काठमाडौं । देशको वर्तमान समस्या कोरोना संक्रमणको रोकथाम र नियन्त्रण उपचारनै भएकाले अहिले नै यस विषयमा खर्चको हिसाब किताब खोजेर कामलाई अवरोध खडा नगर्न प्रधानमन्त्री केपी शर्मा ओलिले आग्रह गरेका छन् ।
कोभिड १९ को रोकथाम, नियन्त्रण तथा उपचारमा भएको खर्चको हिसाब प्रक्रिया अनुसार सार्वजनिक हुने बताउदै शंकाको दृष्टिले नहेर्न उनले आग्रह गरेका हुन् । बुधबारको प्रतिनिधी सभाको बैठकमा विनियोजित बजेटमाथि सांसदहरुले उठाएको प्रश्नको जवाफ दिदै प्रदेश र स्थानीय तहको काम गराई असाधारण रहेको भन्दै काम गरिरहेकाहरुलाई भावनामा ठेस पुग्ने शब्दावली प्रयोग नगर्न समेत उनले आग्रह गरे ।
उनले भने, ‘केन्द्रले प्रदेश र स्थानीय तहमा रकम पठाउँछ, दिनैपिच्छे लेखापरीक्षण हुदैन, कामका बेला लेखापरीक्षण तर्फ केन्द्रित पनि भएका छैनाँै, यस्तो परिस्थितिमा अविश्वासबाट थाल्नुपर्ने पनि छैन । यस्तो परिस्थितिमा तिनीहरु भ्रष्टाचार गर्नै पर्खि बसेका थिए र बजेट पाउने वित्तिकै भ्रष्टाचार गरे भन्ने पनि होइन ।’
प्रधानमन्त्रीले महामारीको संकटमा कसैले भ्रष्टाचार गरेको पाईए सरकारे कानुनी कारवाही गर्ने प्रतिवद्धता जनाउदै अरुलाई लाञ्छना लगाउने र सधै अनियमितता भयो भन्ने प्रवृतिमा नबग्न आग्रह गरेका छन् । उनले कुनै हिसाबले भ्रष्टाचार हुन नदिने आफ्नो प्रतिवद्धतामा आश्वस्त हुने विश्वास आफूले लिएको बताउनुभयो ।
प्रधामन्त्री ओलीले कोभिड १९ सबैको साझा शत्रु भएकाले यसको नियन्त्रणका लागि भएका कार्यका बारेमा आएका आलोचनाहरुलाई आफुले सकारात्मक रुपमा लिएको बताए । आफुले गरेको कामलाई शतप्रतिशत भएको कुरा गर्न नसके पनि जति भएका छन् ति सबै प्रभावकारी ढंगले भएको दाबी गरे ।
