बालिका बलात्कृत गर्ने मदन अधिकारीलाई साधारण सदस्य समेत नरहने गरि नेकपाको कारवाही

 तेह्र वर्षिय बालिकालाई यौन शोषण गर्दै आएका धनकुटाका शिक्षक मदन अधिकारीलाई साधारण सदस्य समेत नरहने गरि नेपाल कम्युनिष्ट पार्टी धनकुटाले कारवाही गरेको छ ।

पार्टीका जिल्ला अध्यक्ष तथा संघीय सांसद राजेन्द्र राईले आइतबार एक विज्ञप्ती जारी गर्दै अधिकारीमाथि गम्भीर प्रकारको आरोप लागेको र उनी जिल्ला प्रहरी कार्यालय धनकुटाको हिरासतमा रहेका कारण उनको मुद्धाको किनारा नलागुञ्जेलसम्मका लागि पार्टीको साधारण सदस्यता समेत नरहे गरी निष्कासन गरिएको जनाएका छन् ।

अधिकारी धनकुटा नगरपालिका वडा नं. ६ स्थित माथिल्लो गोकुण्डेश्वर माविमा पढाउने शिक्षक हुन् ।

उनी पूर्वमाओवादीको शिक्षक संगठनको केन्द्रिय सदस्य थिए । हाल उनी पार्टी जिल्ला कमिटीको प्रचार विभाग उपप्रमुख समेत हुन् ।

धनकुटा नगरपालिका वडा नंम्बर ६ आत्माराकी १३ वर्षीय दलित बालिकालाई ललाईफकाई यौन शोषण गर्दै आएको आरोप छ ।

सो घटनाका आरोपित अधिकारी सहित धनकुटा वडा नं. ६ कै गौरी अत्री, सिरान बजारका देवेन्द्र श्रेष्ठ र कचिडेका भक्तबहादुर मगरलाई प्रहरीले पक्राउ गरेको थियो ।

शिक्षक अधिकारीले परीक्षाको फाराम भर्न तिम्रो बुबाको नागरिकता चाहिएको छ ल्याएर आउनु भनेपछि नागरिकता बोकेर गएका बेला उनकै घरमा बलात्कार गरेको बालिकाले बताएकी छन् ।