_1693980289.gif "#")
कोभिड १९ को संक्रमण रोकथामका लागि घोषणा गरिएको लकडाउनको समयमा बन्द भएका विद्यालयहरुको भर्ना तथा पठनपाठन स्थगित रहेकाले कुनै पनि किसिमको शैक्षिक कार्यक्रमहरु संचालन नगर्न शिक्षा, विज्ञान तथा प्रविधि मन्त्रालयले निर्देशन जारी गरेको छ ।
पछिल्लो समय अनलाईन शिक्षाको नाममा विद्यालयहरुले शुल्क लिने खोजेको आरोप लाग्न थाले पछि मन्त्रालयले निर्देशन जारी गर्दै नेपाल सरकारको अर्को निर्णय नभए सम्म कुनै पनि विद्यालयले कुनै पनि कक्षा वा तहमा नयाँ भर्ना नगर्नु, नगराउन निर्देशन जारी गरेको छ ।
मन्त्रालयका सहसचिव एवंम प्रवक्ता दिपक शर्माद्वारा हस्ताक्षरित सोमबार जारी पत्रमा भर्नाको नाममा कुनै किसिमले शुल्क लिने, अनलाईन पठनपाठनको नाममा शुल्क लिने वा बैंक खातामा रकम जम्मा गर्न लगाउने जस्ता कार्यहरु नगर्नु नगराउनु हुन सुचित गरिएको छ ।
त्यसै गरि माध्यमिक शिक्षा परिक्षा र कक्षा ११ र १२ का परिक्षाहरु स्थगित रहेको अवश्थामा मन्त्तालयबाट वस्तुस्थितीको सुक्ष्म अध्ययन र परामर्श लिने कार्य जारी रहेको हुँदा परिक्षा संचालन सम्बन्धमा हाल सम्म कुनै थप वा नयाँ निर्णय नभएको जनाएको छ । संस्थागत विद्यालयहरुले माध्यमिक तह सम्मको एक महिनाको शुल्क मध्ये आवास शुल्क बाहेक अन्य सबै प्रकारको शुल्क छुट दिने भनी नेपाल सरकारले गरेको निर्णय कार्यान्यवन गरि अभिभावक तथा स्थानीय तहलाई आवश्यक जानकारी दिन पनि मन्त्रालयले निर्देशन दिएको छ ।
