लकडाउन खुकुलो बनाउने तयारी "ग्रिन जोनमा लकडाउन हटाउने तयारी"

कोरोनाको संक्रमणलाई कम गर्न जारी लकडाउनले सर्वसाधारणको जनजिवनमा पारेको प्रभावलाई विश्लेषण गर्दै सरकारले बहिर्गमन रणनिति तयार पारेको छ ।
गत चैत्र ११ गते देखि शुरु भएको लकडाउन तिन पटक सम्म थप गर्दै वैशाख २५ गते सम्म लकडाउन घोषणा गरिएको छ । लकडाउनका कारण जनजिवन अस्तव्यस्त बनेको छ । लकडाउनले पारेको प्रभावलाई कम गर्दै खुकुलो र खुला गर्ने उद्देश्य सहित सरकारले कोरोना भाइरस कोभिड–१९ बहिर्गमन रणनीति तयार पारेको हो ।

प्रधानमन्त्री तथा मन्त्रिपरिषद् कार्यालयले तयार पारेको रणनीति कार्ययोजनामा सिंगो देशलाई तीन क्षेत्रमा विभाजन गरी सोही अनुसार लकडाउनलाई खुकुलो बनाइने तयारी गरिएको हो । जसअनुसार अब स्वास्थ्यसम्बन्धी तथ्यांक र वैज्ञानिक विश्लेषणका आधारमा देशका विभिन्न भागलाई हरियो क्षेत्र (ग्रिन जोन), पहेँलो क्षेत्र (एलो जोन) र रातो क्षेत्र (रेड जोन) मा विभाजन गरिनेछ ।

ग्रिन जोनमा पर्ने जिल्ला तथा क्षेत्रमा लकडाउन हटाएर सबै क्रियाकलाप खुला राखिने प्रधानमन्त्री तथा मन्त्रिपरिषद् कार्यालय स्रोतले जानकारी दिएको छ । यसैगरी, संक्रमण नियन्त्रण उन्मुख रहेको जिल्ला र क्षेत्रलाई एलो जोन र सो क्षेत्रमा मुख्य क्रियाकलाप मात्रै खुला गरिने र संक्रमण नियन्त्रण बाहिर रहेको क्षेत्रमा भने लकडाउन जारी राखिनेछ ।