_1693980289.gif "#")
लाइसेन्स प्राप्त राइफल जाकटी (बन्धकी) राखेको अभियोगमा सुनसरीको धरानबाट दुईजना पक्राउ परेका छन् । सिकार खेल्न प्रयोग हुने मेडइन क्यानडा लेखिएको स्कोप सहितको एक थान र अर्को एक राइफल त्यसमा लाग्ने २ राउन्ड गोलीसहित धरान बस्ने प्रक्षितजङ्ग क्षेत्री र मुलिक सिंह लिम्बू पक्राउ परेका हुन् ।
प्रहरीले बरामद गरेको राइफल दशमलव २२ लङ र १२ बोर हो । जून सिकार खेल्न प्रयोग गरिन्छ ।
प्रक्षितजङ्ग क्षेत्रीको कोठामा प्रहरीले तलासी लिँदा दशमलव २२ लङ राइफल र सोमा प्रयोग हुने म्यागजिन १ थान र २ राउन्ड गोली बरामद भएको थियो । अर्काे १२ बोरपनि सोही कोठामा बरामद भएको थियो ।
यी दुवै राइफल मुलुकसिंहको रहेको प्रहरीले जनाएको छ । इलाका प्रहरी कार्यालय धरानका प्रहरी निरीक्षक हेमराज ओलीका अनुसार बरामद दुवै राइफल लाइसेन्स प्राप्त भएको अपराध न्यूजलाई बताए ।
'मुलुकसिंहको राइफल क्षेत्रीको घरमा राखेको सूचनाको आधारमा दुवै जनालाई नियन्त्रणमा लिइएको हो' उनले भने 'लाइसेन्स प्राप्त हतियार सम्बन्धी व्यक्तिले मात्र राख्ने नियम छ' ।
मुलुकसिंहले दुवै हतियार १५ हजार रुपैयाँमा बन्धकी राखेको प्रारम्भीक अनुसन्धानबाट देखिएको बताइएको छ । ४० वर्षीय मुलुकसिंह बेलायत सेनामा केही समय कार्यरत रहेर फर्किएका व्यक्ति हुन् ।
अपराध संहिताकाे परिच्छेद ६ काे दफा १३२ काे १ मा 'कसैले कानून बमाेजिम प्राप्त गर्न, राख्न, भण्डारण गर्न, प्रयाेग गर्न वा लिएर हिँड्न सकिने हातहतियार इजाजतपत्र प्राप्त नगरी वा इजाजतपत्र प्राप्त गरेकाे भए पनि इजाजत पत्रकाे शर्त वा बन्देज विपरीत हुने गरी प्राप्त गर्न, राख्न, भण्डारण गर्न, प्रयाेग गर्न वा लिएर हिँड्न हुँदैन' भनेर स्पष्टसँग लेखेकाे छ ।
साेही दफाकाे उपदफा २ मा उपदफा (१) बमाेजिमका कसूर गर्ने वा गराउने व्यक्तिलाइ पाँच वर्षसम्म् कैद र पचास हजार रूपैयाँसम्म जरिवाना हुनेछ ।
