काठमाडौं/ बिरालो र खरायोको खानाको प्याकेटभित्र लुकाएर नेपाल भित्र्याइएको ५.५ किलो लागुऔषध सेतो हेरोइनसहित एक भारतीय नागरिक पक्राउ परेका छन्।
लागुऔषध नियन्त्रण ब्यूरो शाखा कार्यालय त्रिभुवन अन्तर्राष्ट्रिय विमानस्थल गौचरमा खटिएको प्रहरी टोलीले थाइल्याण्डबाट नेपाल आएका भारतको महाराष्ट्रस्थित पुणेका ५२ वर्षीय रेवराज तिघारे (REWARAJ TIGHARE) लाई पक्राउ गरेको हो।
प्रहरीले मिति २०८३ कात्तिक २८ गते शंकास्पद यात्रुको निगरानी तथा प्रोफाइलिङ गर्ने क्रममा उनलाई चेकजाँच गरेको थियो। सोही क्रममा उनले बोकेको लगेजभित्र बिरालो र खरायोको खानाको प्याकेटमा लुकाएर राखिएको ५.५ किलो सेतो हेरोइन फेला परेको प्रहरीले जनाएको छ।
प्रहरीका अनुसार बरामद हेरोइनको नेपाली बजार मूल्य प्रतिग्राम ४० हजार रुपैयाँका दरले करिब २२ करोड रुपैयाँ पर्छ। उक्त हेरोइन भारत पुगेपछि अझै महँगो मूल्यमा बिक्री हुने अनुसन्धानबाट खुलेको प्रहरीले जनाएको छ।
अनुसन्धानका क्रममा पक्राउ परेका तिघारे यसअघि पनि दुईपटक लाओसबाट नेपाल आएको खुलेको छ। उनी सन् २०२५ नोभेम्बर ४ र सन् २०२६ फेब्रुअरी २६ मा नेपाल आएको तथा पहिलोपटक हवाई र दोस्रोपटक स्थलमार्ग हुँदै भारतसम्म लागुऔषध पुर्याएको बुझिएको प्रहरीले जनाएको छ।
उनले लाओससहित जिम्बाब्वे, सुडान, बंगलादेश, भियतनाम र कम्बोडियासमेत भ्रमण गरेको पाइएको छ। प्रहरीको प्रारम्भिक अनुसन्धानमा उनी अन्तर्राष्ट्रिय लागुऔषध कारोबारको सञ्जालमा मुख्य भूमिका निर्वाह गर्ने व्यक्ति रहेको खुलेको छ। उनको साथबाट मेकानिकल इन्जिनियरको प्रमाणपत्रसमेत बरामद भएको छ।
प्रहरीले उनको साथबाट हेरोइनबाहेक एउटा राहदानी र एउटा मोबाइलसमेत बरामद गरेको छ।
लागुऔषध (नियन्त्रण) ऐन, २०३३ अनुसार ५.५ किलो सेतो हेरोइन कारोबारमा संलग्नलाई १५ वर्षदेखि जन्मकैदसम्मको सजाय र ५ लाखदेखि २५ लाख रुपैयाँसम्म जरिवाना हुन सक्ने कानुनी व्यवस्था रहेको प्रहरीले जनाएको छ।
पक्राउ परेका भारतीय नागरिकमाथि लागुऔषध नियन्त्रण ब्यूरोले थप अनुसन्धान गरिरहेको छ।