धरान/ आगलागीलगायत विपद्का घटनाबाट हुने जनधनको क्षति न्यूनीकरण तथा आपत्कालीन प्रतिकार्यलाई प्रभावकारी बनाउने उद्देश्यले सुनसरीमा सुरक्षा निकायको संयुक्त नमुना अभ्यास गरिएको छ ।
नेपाली सेना श्री भगवतीदल गणको आयोजना तथा जिल्ला प्रशासन कार्यालय सुनसरीको समन्वयमा आज धरान उपमहानगरपालिका–८ स्थित औद्योगिक क्षेत्र परिसरमा आगलागी नियन्त्रण तथा उद्धारसम्बन्धी नमुना अभ्यास गरिएको हो ।
अभ्यास कार्यक्रममा नेपाली सेना, नेपाल प्रहरी, सशस्त्र प्रहरी बल नेपाल, धरान उपमहानगरपालिकाको दमकल टोली र नगर प्रहरीको संयुक्त टोलीले आगलागी नियन्त्रण, बारुणयन्त्रको प्रयोग, घाइतेको उद्धार र प्राथमिक उपचारलगायतका प्रक्रियाको व्यावहारिक प्रदर्शन गरेको श्री भगवतीदल गणका गणपति देवराज भट्टले जानकारी दिए ।
सुख्खायाम तथा चाडपर्वका समयमा विद्युत् सर्ट, ग्यास चुहावट, मानवीय लापरवाही, औद्योगिक दुर्घटना तथा सुख्खा मौसमका कारण आगलागी हुने सम्भावित जोखिम न्यूनीकरण र आपत्कालीन प्रतिकार्यलाई प्रभावकारी बनाउने उद्देश्यले अभ्यास गरिएको गणपति भट्टले बताए ।
अभ्यासअघि सम्भावित आगलागी तथा अन्य विपद्का घटनाको सूचना प्रवाह, अन्तरनिकाय समन्वय, निर्णय प्रक्रिया, स्रोतसाधनको पहिचान तथा परिचालन, उद्धार र राहत व्यवस्थापन, घाइतेको उपचार, सुरक्षा व्यवस्थापन तथा जनचेतना अभिवृद्धिलगायतका विषयमा छलफलसमेत गरिएको उनको भनाई थियो ।
यस्ता अभ्यासले विपद्का समयमा सुरक्षा निकाय तथा अन्य सरोकारवाला निकायबीच समन्वय र सहकार्य सुदृढ गर्दै आपत्कालीन तयारी तथा प्रतिकार्यको संयन्त्रलाई थप प्रभावकारी बनाउन सहयोग पुग्ने उनले बताए ।
कार्यक्रममा सुनसरीका प्रमुख जिल्ला अधिकारी ईश्वरीप्रसाद अर्यालले आगलागीलगायत विपद्वबाट हुने क्षति न्यूनीकरणका लागि सबै क्षेत्रका नागरिकमा सचेतना र पूर्वतयारी आवश्यक रहेको बताए ।
आगलागीको जोखिमबारे सबै नागरिक सचेत र पूर्वतयार रहनुपर्ने बताउँदै उनले आगलागी भइहालेमा तत्काल नियन्त्रण गर्ने, सम्भावित क्षति न्यूनीकरण गर्ने तथा घाइतेको उद्धार र उपचार गर्ने तरिकाबारे जानकारी दिन यस्ता अभ्यास उपयोगी उनले जानकारी दिए ।
कार्यक्रममा जिल्ला प्रहरी कार्यालय सुनसरीका प्रहरी प्रमुख पुष्पराज मल्ल, सशस्त्र प्रहरी बल नेपाल नं। ४ गण हेडक्वार्टरका प्रमुख लबकुमार सापकोटा, राष्ट्रिय अनुसन्धानका निर्देशक विमल घिमिरे, धरान औद्योगिक क्षेत्रका प्रमुख जीवनारायण बन्जाडेलगायत विभिन्न निकायका प्रमुखहरूको सहभागिता रहेको थियो ।
