झापा/ झापाको मेचीनगरमा जुवाजन्य खेल डाइस (लंगुरबुर्जा) खेलिरहेको अवस्थामा प्रहरीले चार जनालाई पक्राउ गरेको छ।
मेचीनगर नगरपालिका–८ इटाभट्टाचोकमा डाइस खेलाइरहेको सूचनाका आधारमा जिल्ला प्रहरी कार्यालय झापा र अस्थायी प्रहरी पोष्ट इटाभट्टाबाट खटिएको संयुक्त प्रहरी टोलीले उनीहरूलाई नियन्त्रणमा लिएको हो।
प्रहरीले उनीहरूको साथबाट नेपाली नगद १८ हजार ५० रुपैयाँ, भारतीय रुपैयाँ २०० र डाइस बरामद गरेको जनाएको छ।
पक्राउ पर्नेमा मेचीनगर–६ का चेतबहादुर लिम्बु र दीपक चौधरी, मेचीनगर–५ का सनम तामाङ तथा मेचीनगर–७ का जुगल भुजेल रहेका छन्।
पक्राउ परेका चारै जनामाथि आवश्यक अनुसन्धान भइरहेको जिल्ला प्रहरी कार्यालय झापाले जनाएको छ।
