धरान/ सुनसरीको बर्जु गाउँपालिका–२ मा प्रहरीले ठूलो परिमाणमा लागूऔषध गाँजा बरामद गरेको छ। प्रहरीले सुमो गाडीभित्र लुकाएर लैजाँदै गरेको ५६४ किलो गाँजा बरामद गरेको हो।
प्रहरीका अनुसार बुधबार राति करिब ११ः४० बजे विराटनगर–बेलाहा सडकखण्डमा इलाका प्रहरी कार्यालय सितागञ्ज, प्रहरी चौकी अमडुवा र बीओपी अमडुवाबाट खटिएको संयुक्त प्रहरी टोलीले विराटनगरबाट बेलाहातर्फ जाँदै गरेको बा १२ च १७३८ नम्बरको सुमो रोकेर चेकजाँच गर्ने क्रममा चालक गाडी छाडेर फरार भएका थिए।
त्यसपछि प्रहरीले गाडी चेकजाँच गर्दा गाँजा ५६४ किलो पदार्थ फेला पारेको हो। गाडी र बरामद पदार्थ नियन्त्रणमा लिएर इलाका प्रहरी कार्यालय दुहबीमा ल्याइएको प्रहरीले जनाएको छ।
फरार चालकको पहिचान तथा खोजतलास भइरहेको छ भने घटनाबारे थप अनुसन्धान जारी रहेको प्रहरीले जनाएको छ।
