सुनसरी/ खोटाङको दिक्तेल रुपाकोट मझुवागढी नगरपालिका–११ को जंगलमा बाँदर खेदाउने क्रममा भरुवा बन्दुकको गोली लागेर एक जनाको घटनास्थलमै मृत्यु भएको छ।
मंगलबार दिउँसो करिब साढे २ बजे जंगलमा बाँदर खेदाउने क्रममा ५४ वर्षीय भलबहादुर तामाङले चलाएको भरुवा बन्दुकको गोली लाग्दा उनका काकाका छोरा ५३ वर्षीय श्यामबहादुर तामाङको मृत्यु भएको प्रहरीले जनाएको छ।
गोली लागेर गम्भीर घाइते भएका श्यामबहादुरको घटनास्थलमै मृत्यु भएको हो।
घटनापछि प्रहरीले भरुवा बन्दुकसहित भलबहादुर तामाङलाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
