सुनसरी/ सुनसरीको बराहक्षेत्रमा प्रहरीले ठूलो परिमाणमा गाँजा बरामद गरेको छ। बराहक्षेत्र–चतरा भित्री सडकखण्डबाट ४१८ किलो गाँजासहित चार जनालाई प्रहरीले नियन्त्रणमा लिएको हो।
शनिबार (आज)बिहान करिब ५ः३० बजे बराहक्षेत्र नगरपालिका–१ स्थित गुप्त बराह क्षेत्रमा लागूऔषध ओसारपसार भइरहेको सूचनाका आधारमा इलाका प्रहरी कार्यालय महेन्द्रनगरबाट खटिएको प्रहरी टोलीले बराहक्षेत्रबाट चतरा आउँदै गरेका एउटा कार र मोटरसाइकल रोकेर जाँच गरेको थियो।
जाँचका क्रममा प्र १–०२–००२ च ४८५१ नम्बरको कारभित्र २२ वटा प्लास्टिकका पोकामा प्याक गरिएको ४१८ किलो गाँजा फेला परेको प्रहरीले जनाएको छ।
गाँजासहित प्रहरीले कार चालक धरान उपमहानगरपालिका–१३ का ३४ वर्षीय थमन राई, कारमा सवार ओखलढुङ्गाको मानेभञ्ज्याङ गाउँपालिका–५ की २२ वर्षीया जिबनी राई तथा को ११ प ५६०१ नम्बरको मोटरसाइकल चालक मोरङ कटहरी गाउँपालिका–३ का २६ वर्षीय अमर कामत र पछाडि सवार ३८ वर्षीय शंकर चौधरीलाई नियन्त्रणमा लिएको छ।
प्रहरीले गाँजा, कार र मोटरसाइकलसहित चारै जनालाई इलाका प्रहरी कार्यालय महेन्द्रनगरमा ल्याएर घटनाबारे थप अनुसन्धान गरिरहेको जनाएको छ।
