धरान/ सुनसरीको धरान उपमहानगरपालिकाका विभिन्न स्थानबाट ब्राउन सुगर र नगदसहित दुई जनालाई प्रहरीले पक्राउ गरेको छ।
मिति २०८३ असार १८ गते कोशी प्रदेश प्रहरी कार्यालय (PIT) विराटनगर र अस्थायी प्रहरी पोस्ट जोरसखुवा, धरानबाट संयुक्त रूपमा खटिएको प्रहरी टोलीले धरानका दुई स्थानमा छापा मारेर उनीहरूलाई नियन्त्रणमा लिएको हो।
प्रहरीका अनुसार धरान–१५ स्थित बिग फुटसल नजिकबाट धरान–३ निवासी ४३ वर्षीय शंकर गिरीलाई पक्राउ गरिएको छ। उनको साथबाट ब्राउन सुगर २.०८ ग्राम र नगद ६ हजार रुपैयाँ बरामद भएको प्रहरीले जनाएको छ।
यस्तै, धरान–७ पानमारा स्ट्यान्ड क्षेत्रमा सेवानुङ होटल सञ्चालन गर्दै आएका ३६ वर्षीय रितेश भुजेललाई पनि प्रहरीले पक्राउ गरेको छ। उनको साथबाट ब्राउन सुगर ३.०४ ग्राम र नगद ४७ हजार रुपैयाँ बरामद भएको छ।
पक्राउ परेका दुवै जनालाई इलाका प्रहरी कार्यालय धरानमा राखी लागूऔषध सम्बन्धी कसुरमा थप अनुसन्धान भइरहेको प्रहरीले जनाएको छ।
