सुनसरी / नेकपा (एमाले)का अध्यक्ष केपी शर्मा ओली जेन–जी आन्दोलनपछि पहिलोपटक आफ्नो निर्वाचन क्षेत्र दमक आउन लागेका छन्।
प्रतिनिधिसभा निर्वाचनका लागि झापा–५ बाट उम्मेदवारी दर्ता गर्न अध्यक्ष ओली आज झापा आउने कार्यक्रम रहेको छ।
कार्यतालिकाअनुसार अध्यक्ष ओली बिहान १०:२५ बजे जहाजमार्फत भद्रपुर अवतरण गर्नेछन्।
एमाले केन्द्रीय सदस्य तुलसी कार्कीका अनुसार भद्रपुरमै उनले झापा क्षेत्र नं. १ र ३ का नेता तथा कार्यकर्तासँग भेटघाट गर्दै निर्वाचन तयारी र पछिल्लो राजनीतिक अवस्थाबारे जानकारी लिनेछन्।
त्यसपछि क्षेत्र नं. २ का लागि बिर्तामोड र क्षेत्र नं. ४ का लागि सुरूंगा पुगेर स्थानीय नेतृत्वसँग छलफल गर्ने कार्यक्रम छ।
आफ्नो निर्वाचन क्षेत्र दमक–५ मा भने अध्यक्ष ओलीले नेता तथा कार्यकर्तासँग प्रत्यक्ष भेटघाट गर्नेछन्।
एमालेका अनुसार जेन–जी आन्दोलनका क्रममा जलाइएको दमकस्थित आफ्नै निवासमा समेत अध्यक्ष ओली जाने तयारी रहेको छ।
पार्टीले यस भ्रमणलाई जेन–जी आन्दोलनपछि अध्यक्ष ओलीको पहिलो क्षेत्रीय राजनीतिक सक्रियताका रूपमा अर्थ्याएको छ।
