बोलेरो गाडीमा ७६३ केजी गाँजा बरामद, दुई जना पक्राउ
- पुस १२, २०८२
- कोशीपत्र/संवाददाता
सुनसरी/ उदयपुरमा प्रहरीले ठुलो परिमाणमा प्रतिबन्धित लागूऔषध गाँजा बरामद गरेको छ।
गएराती विशेष सूचनाको आधारमा चौदण्डीगढी नगरपालिका–३, पैँतालिस चोकमा गरिएको चेकजाँचमा ७६३.७६ किलो गाँजा फेला परेको छ।.
बरामद गाँजा बोकेको बोलेरो गाडी (को १ ज ३४५६) पूर्व रामपुरबाट पश्चिम गाईघाट तर्फ जाँदै गर्दा प्रहरीले नियन्त्रणमा लिएको हो। गाडीमा सवार चालक रविन कुमार राई (२३, बेलका–६) र अर्का व्यक्ति राम बहादुर राई (२८, बेलका–९) पनि पक्राउ परेका छन्।
प्रहरीले गाडी, चालक र बरामद गाँजा इलाका प्रहरी कार्यालय बेल्टारमा राखेर थप अनुसन्धान सुरु गरेको जनाएको छ।
उदयपुरमा पछिल्लो समय प्रतिबन्धित लागूऔषध गाँजाको ओसारपसार बढेको र यसको नियन्त्रणका लागि जनचेतना कार्यक्रम र सुरक्षा उपायलाई थप प्रभावकारी बनाउनु आवश्यक रहेको प्रहरीको भनाइ छ।
