धरान/ अशोक राई नेतृत्वको जनता समाजवादी पार्टी (जसपा) कोशी प्रदेशको अध्यक्षमा गणेश राई चयन भएका छन्।
शुक्रबार धरानमा सम्पन्न प्रदेश भेलाले राईको नेतृत्वमा सर्वसम्मत रूपमा ४९ सदस्यीय कोशी प्रदेश समिति गठन गरेको हो।
नवगठित समितिको उपाध्यक्षमा डिल्ली सुव्वा, रमा कार्की र नसरुल महम्मद चयन भएका छन्।
महासचिवमा नगेन्द्र पारघरी लिम्बू नियुक्त भएका छन् भने सचिवमा गणेश खालिङ, कुमार सुनुवार र रन्जित साम्पाङ चयन भएका छन्। सदस्यहरूमा सुमन राई, दुर्गा गुरुङ, दुर्गा राईलगायत रहेका छन्।
अघिल्लो समितिका केही नेता तथा कार्यकर्ता नेपाली कम्युनिस्ट पार्टीमा प्रवेश गरेपछि संगठनलाई पुनः सुदृढ बनाउने उद्देश्यसहित नयाँ समिति गठन गरिएको पार्टीले जनाएको छ।
नव निर्वाचित अध्यक्ष गणेश राईले कोशी प्रदेशमा जनता समाजवादी पार्टीलाई पहिलो शक्ति बनाउने लक्ष्यका साथ संगठन विस्तार, जनआधार मजबुत पार्ने र पार्टी निर्माणको अभियानलाई तीव्र बनाउने प्रतिबद्धता व्यक्त गरेका छन्।
