धरान / मिति २०८२।०८।२५ – धरान उप–महानगरपालिका–२० लिङ्देन मोडमा रातिको गस्तीमा खटिएको प्रहरी टोलीलाई देख्नेबित्तिकै दुई जना मानिसले बोकेर ल्याउँदै गरेका दुई बोरा सडकछेउमै फालेर अन्धकारमा भागेका छन्।
कोशी प्रदेश प्रहरी कार्यालय बिराटनगर र अस्थायी प्रहरी चौकी विष्णुपादुकाबाट संयुक्त रूपमा खटिएको टोलीले राति ११:५५ बजे गस्ती गरिरहेका बेला ती व्यक्तिहरूले एक्कासि बोरा छाडेर फरार भएको अधिकारीहरूले जानकारी दिएका छन्।
गस्ती टोलीले तत्कालै दुवै बोरा खोलि जाँच गर्दा भित्र राम्रोसँग प्याक गरिएको अवस्थामा करिब ३० केजी गाँजा जस्तो देखिने लागू औषध फेला परेको थियो।
बरामद गरिएको उक्त ठूलो मात्रा इलाका प्रहरी कार्यालय धरानमा ल्याई सुरक्षित राखिएको छ।
फरार रहेका दुईजनाको पहिचान खुल्न बाँकी रहेको र प्रहरी टोलीले घटनास्थल वरपर र सम्भावित आश्रित स्थानहरूमा खोजतलास तीव्र पारेको छ।
यसैबीच, प्रहरीले लागू औषध कारोबारमा संलग्न समूहबारे थप सूचनाका लागि स्थानीयलाई पनि सतर्क रहन आग्रह गरेको छ।
