धरान/ आज बिहान वराहक्षेत्र–८ स्थित सडकछेउमा बेवारिसे अवस्थामा एक नवजात शिशु फेला परेको छ। शिशुको पहिचान अहिलेसम्म खुल्न सकेको छैन।
स्थानीयवासीले बिहान करिब ७ बजे रोएको आवाज सुनेर खोजी गर्दा शिशु फेला पारेका थिए। सूचना पाएलगत्तै इलाका प्रहरी कार्यालय चक्रघट्टीका प्रमुख दिवस कुँवर नेतृत्वको टोली घटनास्थलमा पुगेको थियो। प्रहरीले शिशुलाई उद्धार गरी नगर अस्पताल चक्रघट्टी उपचारका लागि लगेका छन्। अस्पतालका अनुसार शिशुको अवस्था हाल सामान्य रहेको छ।
स्वास्थ्यकर्मीहरूले बताएका अनुसार, फेला परेको शिशु छोरा रहेको र आजै जन्मिएको हुन सक्ने अनुमान गरिएको छ।
रोचक कुरा के भने, शिशु भेटेकी एक स्थानीय महिलाले अभिभावक नआएमा शिशुको पालन–पोषण आफूले गर्ने इच्छा व्यक्त गरेकी छन्। उनका अनुसार, विवाह भए पनि सन्तान नभएको कारण उनले उक्त शिशुलाई आफ्नै छोराको रूपमा पालन गर्न चाहेको बताइन्।
इलाका प्रहरी कार्यालय महेन्द्रनगरका प्रमुख दिवस कुँवरले शिशु कसको हो र कसले छाडेर गएको हो भन्ने विषयमा अनुसन्धान सुरु गरिएको जानकारी दिएका छन्।
