पाँचथर/ पाँचथरको हिलिहाङ गाउँपालिका–१ मा छोराले बाबुमाथि चिर्पट प्रहार गरी हत्या गरेका छन्।
स्थानीय ३१ वर्षीय सन्देश राईले आफ्नै ६९ वर्षीय पिता युवराज राईको हत्या गरेको जिल्ला प्रहरी कार्यालय पाँचथरका प्रमुख डिएसपी अनीश कर्णले जानकारी दिए।
उनका अनुसार आइतबार बिहान सन्देशले करेसाबारीमा बाबुमाथि प्रहार गरेको खुलेको छ। घटनापछि युवराजको शव घर नजिकैको करेसाबारीमा फेला परेको थियो।
बाबु–छोरा दुबै जना मदिरा सेवनपछि विवादमा उत्रिएको र त्यही क्रममा सन्देशले चिर्पट प्रहार गरेको प्रारम्भिक अनुसन्धानमा खुलेको प्रहरीले जनाएको छ।
घटनाको जानकारी पाएलगत्तै खटिएको प्रहरी टोलीले सन्देशलाई नियन्त्रणमा लिएर थप अनुसन्धान अघि बढाएको छ। युवराजको शव पोष्टमार्टमका लागि पाँचथर जिल्ला अस्पताल पठाइएको प्रहरीले जनाएको छ।
