_1693980289.gif "#")
झापा/शिवसताक्षी नगरपालिका–१० माईधार चौकमा मंगलबार बिहान साढे ४ बजेतिर रात्रि बस दुर्घटना हुँदा १९ जना घाइते भएका छन्।
रामेछापको मन्थलीबाट काँकडभिट्टातर्फ जाँदै गरेको प्रदेश १–०१–००१ क ४२०९ नम्बरको बस अनियन्त्रित भई सडकबाट करिब १० मिटर तल पल्टिँदा दुर्घटना भएको हो।
बसमा २५ जना सवार रहेका मध्ये १९ जना घाइते भएका छन् भने ६ जना सकुशल आफ्ना गन्तव्यतर्फ गएका छन्।
घाइते सबैलाई तत्काल उद्धार गरी उपचारका लागि बिर्तासिटा अस्पताल, बिर्तामोड पठाइएको प्रहरीले जनाएको छ। बस भने दुर्घटनास्थलमै रहेको र बाटो अबरुद्ध नभएको इलाका प्रहरी चौकी माईधारले जनाएको छ।
दुर्घटनामा झापा मेचीनगर–६ का ३९ वर्षीय चालक राजु भुजेल टाउकोमा चोट लागेर घाइते भएका छन्। साथै रामेछाप, झापा र दोलखाका विभिन्न क्षेत्रका यात्रुहरू पनि घाइते भएका छन्।
घाइतेमध्ये केहीको अवस्था मध्यम रहेको बताइएको छ। प्रहरीका अनुसार बसमा सवार ६५ वर्षीय अम्बर बहादुर बुढाथोकी, १७ वर्षीया इक्षा लिम्बु, ३५ वर्षीय भीमप्रसाद पुरी, २० वर्षीय रबिलाल गनेश, २१ वर्षीया परिना गनेश, ९ वर्षका एलोन कार्की लगायतका यात्रुहरू घाइते भएका हुन्।
सडकमा अवरोध नभए पनि दुर्घटनाको विस्तृत अनुसन्धानका लागि प्रहरी टोली माईधार चौकीबाट खटिएको प्रहरीले जनाएको छ
