काठमाडौँ/ ‘जेनजी आन्दोलन’का अभियन्ता डा. निकोलस भुसाल माइतीघर मण्डलाबाट पक्राउ परेका छन्।
जेनजीको माग सम्बोधन नभएको भन्दै असन्तुष्टि जनाउन भेला भएका भुसालसहित तीन जनालाई प्रहरीले नियन्त्रणमा लिएको हो।
माइतीघर क्षेत्रमा बिहानैदेखि नै बाक्लो प्रहरी परिचालन गरिएको थियो। प्रशासनले पहिल्यै सूचना जारी गर्दै माइतीघर मण्डला लगायतका क्षेत्रमा कुनै पनि धर्ना, जुलुस वा प्रदर्शन गर्न नपाइने जनाएको थियो।
आन्दोलनको एक महिना पूरा भएसँगै भुसालको समूहले मागहरू सम्बोधन नभएको भन्दै विरोध प्रदर्शन गर्ने तयारी गरेको थियो। तर, प्रहरीको कडाइका कारण उनीहरू प्रदर्शन सुरु गर्नै नपाउँदै पक्राउ परेका हुन्।
एक महिना लामो ‘जेनजी आन्दोलन’मा माग पूरा नभएपछि असन्तुष्टि बढ्दै गएको अभियन्ताहरूको भनाइ छ। प्रशासनले भने जनजीवन प्रभावित हुने गतिविधि रोक्न सुरक्षा व्यवस्था कडाइ गरिएको जनाएको छ।
