धरानमा स्कुटरको ठक्करबाट महिलाको मृत्यु, चालक फरार

धरान/सुनसरीको धरान उपमहानगरपालिका–१७  स्कुटरको ठक्करबाट एक महिलाको ज्यान गएको छ।

इलाका प्रहरी कार्यालय धरानका अनुसार मिति २०८२ असोज ११ गते साँझ करिब ६:४० बजे रेल्वेतर्फ जाँदै गरेको प्र–१–०२–०५२ प ५१४६ नं. को स्कुटरले पैदलयात्रीलाई ठक्कर दिएको थियो। ठक्करबाट घाइते भएकी करिब ५० वर्षीया महिलालाई तत्काल उद्धार गरी बीपी कोइराला स्वास्थ्य विज्ञान प्रतिष्ठान, धरानमा उपचारका लागि लगिएको थियो।

गम्भीर घाइते भएकी ती महिलाको टाउकोमा गहिरो चोट लागेकाले अवस्था नाजुक थियोे । उपचारका क्रममा मिति २०८२ असोज १२ गते राति करिब २:३० बजे उनको मृत्यु भएको हो। मृतकको पहिचान धरान–१७ निवासी गंगा भट्टराई (५० वर्ष) भनेर खुलेको छ।

उक्त घटनामा संलग्न स्कुटर र चालक भने ठक्करपछि फरार रहेका छन्। फरार चालकको खोजी तथा अनुसन्धान भइरहेको इलाका प्रहरी कार्यालय धरानले जनाएको छ।