_1693980289.gif "#")
धरान/ हालै धरानमा भएका तोडफोड र आगजनीका घटनाप्रति नगरप्रमुख हर्कराज राई मौन बसेको भन्दै वडाध्यक्ष र कार्यपालिका सदस्यहरुले आलोचना गरेका छन्।
उनीहरुले नगरप्रमुखलाई “गैरजिम्मेवार” आरोप लगाउँदै पीडित धराने जनताको पीडाप्रति वेवास्ता गरेको बताएका छन्।
राजनीतिक दलका कार्यालयदेखि पूर्व मेयर र पूर्व उपमेयरको घरमा क्षति पुर्याइँदा पनि नगरप्रमुख चुप लाग्नु गम्भीर प्रश्न भएको उनीहरुको भनाइ छ।
धरान–१३ का वडाध्यक्ष नेत्रप्रसाद काफ्लेले तत्काल अनुगमन र क्षतिको लगत संकलन गर्न माग गरे। उनले भने, “मन्त्री बन्ने सपना टुटेपछि नगरसभा गर्न त तत्पर, तर जनताको पीडाप्रति चासो नदेखाउनु लापरबाही हो।”
धरान–१७ का वडाध्यक्ष मनोज भट्टराईले आन्दोलनलाई परिवर्तन नभई अराजकताको नतिजा भन्दै, तोडफोड नियोजित तरिकाले भएको बताए।
यद्यपि, मेयर राईले भने दोषी जो–कोही भए पनि कानुनको कठघरामा ल्याइने चेतावनी दिए।
यसैबीच, भदौ २६ मा हुने भनिएको नगरसभा सारेर असोज ४ गते गर्ने निर्णय नगर कार्यपालिकाले गरेको छ। सभामा २ अर्ब २० करोड ७४ लाखको बजेट पारित हुने तयारी छ।
