_1693980289.gif "#")
सुनसरी/धरानमा जेनजी आन्दोलन समाप्त भइसकेपछि भएको तोडफोड र आगजनीका घटनामा संलग्नलाई कडा कारबाहीको माग गर्दै ६ जना पीडितले बिहीबार इलाका प्रहरी कार्यालय धरानमा किटानी जाहेरी दर्ता गरेका छन् ।
भदौ २३ र २४ गते सम्पन्न भएको जेनजी आन्दोलनको नाममा, व्यक्तिगत रिसइवी साँध्ने उद्देश्यले योजनाबद्ध रुपमा तोडफोड र आगजनी भएको दावी गर्दै उनीहरूले १३ जना भन्दा बढीको नाममा जाहेरी दिएका हुन् ।
जाहेरी दर्ता गर्नेहरूमा पूर्व संघीय सांसद जयकुमार राई, नेपाली कांग्रेस कोशी प्रदेशका महामन्त्री उमेश थापा, सुनसरी क्षेत्र नं. १ का सभापति सुजेन्द्र तामाङ, धरान उपमहानगरपालिकाकी कार्यपालिका सदस्य सिर्जना नेपाल, पूर्व उपमेयर मञ्जु भण्डारी सुवेदी र सुवेदीको घरमा डेरा गरी अध्ययन गरिरहेकी एक युवती छन् ।
पीडितहरूका अनुसार उनीहरूले घटनाको स्पष्ट फुटेज र विभिन्न स्थानमा रहेका सीसी क्यामेरा प्रमाणका रूपमा प्रस्तुत गर्दै नामै किटान गरेर जाहेरी दिएका हुन् ।
उनीहरूले धरानमा योजनाबद्ध रूपमा “छानी छानी“ व्यक्तिको सम्पत्तिमाथि आक्रमण गरिएको भन्दै स्थानीय सरकारकै संरक्षणमा यस्तो कार्य भएको आशंका व्यक्त गरेका छन् ।
जाहेरी दर्ताका क्रममा नेपाली कांग्रेस र एमालेका कार्यकर्ताहरूको उपस्थिति रहेको थियो । कोशी प्रदेशका सांसद रमेश बस्नेत र विजयकुमार राई पनि उपस्थित थिए । सांसद बस्नेतले बोल्दै अराजक गतिविधि गर्नेहरूलाई कडा कारबाही गर्नुपर्ने धारणा राखे ।
इलाका प्रहरी कार्यालय धरानका डिएसपी प्रकाश जवेगुले पूर्व मेयर मनोज मेन्याङ्बोले दिएको उजुरीको आधारमा ५ जनालाई नियन्त्रणमा लिइसकेको र थप अनुसन्धान भइरहेको जानकारी दिए ।
उनले नयाँ जाहेरीहरूलाई पनि गम्भीरताका साथ लिएर आवश्यक कानुनी प्रक्रिया अघि बढाइने बताए ।
पूर्व मेयर मनोज मेन्याङ्बोले मंगलबार नै व्यक्तिगत सम्पत्ति तोडफोडमा संलग्नमाथि उजुरी दिएका थिए । त्यसको दुई दिनपछि बिहीबार एकैपटक ६ जनाले प्रहरीसमक्ष जाहेरी दर्ता गरेका हुन् ।
पीडितहरूले आन्दोलनको नाममा विध्वंसकारी तत्वहरूले व्यक्तिगत रिसइवी साँध्न खोजेको र त्यसमा संलग्नलाई हदैसम्मको कारबाही हुनुपर्ने माग गरेका छन् ।
