काठमाडौं/ भ्रष्टाचार, बेथिति र अनियमितताविरुद्ध जेनजीले काठमाडौंमा आयोजना गरेको प्रदर्शनमा आज तनावपूर्ण अवस्था सिर्जना भएको छ।
बिहान ९ बजेदेखि माइतीघर मण्डलाबाट सुरु भएको विरोध मार्च बानेश्वर पुग्दा प्रहरीले अश्रुग्यास प्रहार गरेको हो।
देशभर एकसाथ विरोध प्रदर्शनमा उत्रिएका जेनजी कार्यकर्ताहरू पछिल्लो समयमा सरकारले सामाजिक सञ्जाल बन्द गरेको कदमप्रति विशेष आक्रोशित देखिएका थिए। यही कारण उनीहरूले सामाजिक सञ्जालमार्फतै सरकारविरुद्धको आन्दोलनलाई जनस्तरमा उतारेका हुन्।
शान्तिपूर्ण रूपमा अघि बढिरहेको प्रदर्शन बानेश्वरमा पुग्दा परिस्थिति चर्किएको थियो। माइतीघरबाट आएको समूहले प्रहरीको ब्यारिकेड तोड्दै अगाडि बढ्दा, तीनकुनेबाट आएको अर्को समूह संसद भवनको गेटसम्म पुगेको थियो। संसद भवन क्षेत्रलाई सरकारले निषेधित क्षेत्र घोषणा गरेकाले, प्रहरी बल प्रयोग गर्दै अश्रुग्यास प्रहार गरेको हो।
