_1693980289.gif "#")
धरान/तोकिएको समयभन्दा ढिलो सुरु भएको धरान उपमहानगरपालिकाको आइतबारको कार्यपालिका बैठकमा आगामी नगरसभामा पेश गर्ने नीति तथा कार्यक्रम र कर दरमा सहमति जुट्न सकेन।
एमालेका जनप्रतिनिधिहरूले संशोधनबिनै नीति तथा कार्यक्रम आएको भन्दै आपत्ति जनाएपछि निर्णय स्थगित भएको हो।
बैठकले अब भदौ २५ गते बिहान बस्ने कार्यपालिका बैठकमार्फत अन्तिम प्रस्ताव पारित गर्ने निर्णय गरेको छ। करसम्बन्धी विषयमा पनि असहमति देखिएको छ।
एमाले कार्यपालिका सदस्य अनुप देवानले पाँच बुँदे संशोधन प्रस्ताव पेश गरेका थिए भने वडा ९ का अध्यक्ष रुपेश आचार्य र वडा १९ का अध्यक्ष पुर्ण लिम्बुले कर वृद्धिले जनतामा बोझ पर्नेस भन्दै राहत दिनुपर्ने बताएका थिए।
यसैबीच, बैठकले धरान–८ को तीनकुनेस्थित नयाँ स्मार्ट बसपार्क निजी क्षेत्रलाई ठेक्कामा दिने समितिको प्रतिवेदन भने जस्ताको तस्तै पारित गरेको छ।
प्रतिवेदनअनुसार बसपार्क पाँच वर्षका लागि सार्वजनिक बढाबढमार्फत ठेक्कामा दिने र उपमहानगरले न्यूनतम वार्षिक १ करोड ४० लाख आम्दानी गर्ने अनुमान गरिएको छ।
बसपार्क सञ्चालनमा निजी क्षेत्रलाई जिम्मेवार बनाउन ठेक्काको १५ प्रतिशत रकम मर्मत कोषमा राखिने छ।
यातायात व्यवसायी र सुरक्षा निकायसँगको समन्वयमा बसलाई अनिवार्य रूपमा बसपार्कभित्र प्रवेश गराउने मेयर हर्कराज साम्पाङले स्पष्ट पारे।
