_1693980289.gif "#")
धरान/ धरानको मुख्य नाका तीनकुनेमा सोमबार(आज) खाद्य प्रविधि तथा गुण नियन्त्रण कार्यालय विराटनगर, भिडिजन कार्यालय इनरुवा र धरान उपमहानगरपालिकाको संयुक्त टोलीले दुधजन्य पदार्थ र पिउने पानीको अनुगमन गरेको छ।
मोबाइल ल्याबमार्फत तत्काल गरिएको परीक्षणमा दुधमा कुनै मिसावट नपाइए पनि पिउने पानीका जारहरू भने ठुलो संख्यामा फोहोर, कुचिएका र पुराना भेटिएपछि नष्ट गरिएको हो।
खाद्य अनुसन्धान अधिकृत प्रकृति वस्तीका अनुसार ८ वटा उद्योगका १५६ वटा पानीको जार तत्काल नष्ट गरिएका छन्। उनका अनुसार पुराना, लेबलविहीन र फोहोर जार बिक्रीमा पठाइएको पाइएपछि उद्योगमै फिर्ता पठाइएको हो।
अनुगमनमा गौमुखी गंगाजल प्रालि, जयनेपाल जल उद्योग, दिव्येश्वरी जल उद्योग, पारीजात जल उद्योग र हलेसी एक्वाका जार नष्ट गरिएका थिए। गौमुखी गंगाजल प्रालिको मात्रै ५६ वटा जार नष्ट गरिएको र सुधार गरी ७ दिनभित्र कार्यालयमा उपस्थित हुन निर्देशन दिइएको वस्तीले बताइन्।
यस्तै, उपभोक्ताले गंगाजलको सिलप्याक बोतलभित्र किरा भेटिएको गुनासो गरेपछि सो उद्योगको नमुना समेत संकलन गरिएको छ।
धरान उपमहानगरपालिकाका उपमेयर अइन्द्रविक्रम बेघाले अनुगमन कसैलाई दुःख दिन नभई उपभोक्ताको स्वास्थ्य र बजारलाई अनुशासित बनाउन गरिएको बताए।
उनले भने, “हामी कसैलाई आतंकित बनाउन होइन, उपभोक्तामैत्री बजार बनाउन र सरकारले तोकेको मापदण्डअनुसार गुणस्तरीय सामान बिक्री गर्न प्रेरित गर्न अनुगमन गर्दैछौं।”
