विराटनगर/ नेकपा एमालेभित्र शक्ति संघष बढ्दै गएको संकेत देखिन थालेको छ ।
सोमबार रातारात पूर्वराष्ट्रपति तथा एमालेकी पूर्वउपाध्यक्ष विद्या भण्डारी र कोशी प्रदेशका मुख्यमन्त्री हिक्मतकुमार कार्कीबीच विराटनगरको बिग होटलमा भेटवार्ता भएपछि एमालेको पार्टीभित्र शक्ति संघर्षको संकेत बढेको संकेत देखिएको हो ।
मुख्यमन्त्री कार्की आर्थिक मामिला मन्त्री रामबहादुर राना मगर, आन्तरिक मामिला मन्त्री रेवतीरमण भण्डारी, खानेपानी मन्त्री एकराज कार्की र सामाजिक विकास मन्त्री पाँचकर्ण राईसहित भण्डारीलाई भेट्न पुगेका थिए ।भेटमा करिब एक घण्टा मुख्यमन्त्री कार्की र भण्डारीबीच ‘वान टु वान’ छलफल भएको थियो ।
सो क्रममा भण्डारीले एमाले अध्यक्ष केपी शर्मा ओलीले आफूलाई अपमानित गरेको गुनासो पोखेको निकट स्रोतले जनाएको छ । हालै सक्रिय राजनीतिमा फर्किने घोषणा गरेकी भण्डारीलाई एमाले नेतृत्वले सदस्यता नवीकरण नगर्ने निर्णयसँगै उनको विषयमा छलफलसमेत नगर्न निर्देशन दिएको थियो ।
भण्डारीप्रति ओलीको असन्तुष्टि र त्यसैबीच प्रदेश सरकारको शीर्ष नेतृत्वले उनलाई भेट्न पुग्नु एमालेभित्र शक्ति संघर्ष बढ्दै गएको संकेतको रूपमा लिइएको छ । यसअघि ओलीले भण्डारीबारे कुनै छलफल नगर्न निर्देशन दिएका भए पनि सोमबारको भेटवार्ताले उक्त निर्देशनलाई चुनौती दिएको देखिएको छ ।
विद्या भण्डारी लामो समयसम्म ओलीकै निकट नेतृको रूपमा परिचित रहे पनि पछिल्लो समय उनीहरूबीच सम्बन्ध चिसिएको देखिन्छ ।
विश्लेषकहरूका अनुसार विराटनगरमा भएको भेट एमालेभित्र नयाँ समीकरणको संकेत हुन सक्छ ।
