धरान/बराहक्षेत्र नगरपालिका–१ स्थित मदनभण्डारी राजमार्गअन्तर्गतको दुधपानी खोला तर्ने क्रममा शुक्रबार मोटरसाइकलमा बुबासँगै बगेकी १९ वर्षीया अनिता राई अझैसम्म फेला परेकी छैनन्।
धरान–१६ का जीवन राई र छोरी अनिता सवार मोटरसाइकललाई शुक्रबार दिउँसो करिब १:५० बजे आकस्मिक बढेको भेलले बगाएको थियो। खोलामा बगेका दुवैजना सप्तकोशीमा पुगे पनि स्थानीय र प्रहरीले जीवनलाई भने सकुशल उद्धार गरेका थिए। तर छोरी अनिता भने वेपत्ता भएकी थिइन्।
घटनापछि इलाका प्रहरी कार्यालय महेन्द्रनगरका निरीक्षक दिवस कुँवरको कमाण्डमा ५ जना, चतराका सई राजन खड्कासहित ५ जना, र चतरा पुलबाट असई एकनाथ खतिवडासहित २ जना गरी १२ जना प्रहरी तत्कालै खोजतलासमा खटिएका थिए।
उद्धार गरिएका जीवन राईलाई उपचारका लागि बीपी कोइराला स्वास्थ्य विज्ञान प्रतिष्ठान धरान लगिएको छ।
शनिबार दिनभर अनिताको खोजी कार्य सप्तकोशीमा जारी रह्यो। कायकमार्फत घटनास्थलदेखि राजाबाससम्म खोजी भए पनि कुनै परिणाम नआएको इलाका प्रहरी कार्यालय महेन्द्रनगरका प्रमुख निरीक्षक कुँवरले जानकारी दिए।
“हिजो खसेको ठाउँदेखि राजाबाससम्म आज दिनभर खोज्यौं, तर भेटिएन,” उनले भने।
प्रहरीका अनुसार आइतबार राजाबासदेखि कोशी ब्यारेजसम्म कायककै मद्दतमा खोजतलास गरिनेछ। हाल कोशीमा बाढी बढेपछि दाउरा र रुखका ठुटाहरु बगेका कारण ठूलो बोट सञ्चालनमा कठिनाइ भएपछि हल्का र छरितो ‘कायक’ प्रयोग गरिएको हो।
निरीक्षक कुँवरका शब्दमा, “कायकले कुनाकाप्चा सजिलै खोज्न सकिन्छ, छिटो पनि हुन्छ। अनिता भेटिएपछि मात्र ठूलो बोट प्रयोगमा ल्याइनेछ।”
