झापा/ टिकटकमा फेक आइडी बनाएर मेचीनगर नगरपालिकाका नगरप्रमुख गोपालचन्द्र बुढाथोकीको चरित्र हत्या गरेको आरोपमा साइबर ब्यूरोमा उजुरी दिइएको छ।
नगरप्रमुखको सचिवालयका अनुसार फेक प्रोफाइलमार्फत दुष्प्रचार गर्नेहरूमाथि आवश्यक कानुनी कारबाहीको प्रक्रिया अघि बढाइसकिएको छ।
नगरप्रमुख बुढाथोकीका स्वकीय सचिव आशिष पौडेलले बिहीबार प्रेस विज्ञप्ति जारी गर्दै ‘मिसन २०८४ इलेक्सन’ लगायत फेक नाम र प्रोफाइलमार्फत नगरप्रमुखको नाम र तस्वीर दुरुपयोग गर्दै कपोलकल्पित भिडियो बनाइएको जनाएका छन्।
मालपोत, भन्सार, बस खरिदजस्ता नगरपालिकाको कार्यक्षेत्रमै नपर्ने असान्दर्भिक विषयलाई जोडेर बनाइएका भिडियोहरू पूर्णतः गलत भएको विज्ञप्तिमा उल्लेख छ।
सचिवालयले फेक आइडी सञ्चालनकर्तालाई सार्वजनिकरूपमा उपस्थित हुन चुनौती दिएको छ। केही दिनयता टिकटक र फेसबुकमा त्यस्ता भिडियोहरू भाइरल भइरहेका छन्।
मेचीनगर मात्र नभई बिर्तामोड, दमक, उर्लाबारी, इनरुवा लगायतका नगरप्रमुखहरूलाई समेत लाञ्छना लगाएर भिडियो बनाइने गरेको पाइएको छ।
