धरान/ धरान उपमहानगरपालिका–१६ स्थित नौलो बस्तीमा निर्माण भएको ग्याबिन जाली (तार जाली) सम्बन्धी विवाद अन्ततः समाधान भएको छ।
निर्माण सम्पन्न भइसकेको संरचनाको भुक्तानीमा देखिएको अन्योल अन्त्य गर्न मेयर हर्क साम्पाङको पहलमा सर्वपक्षीय छलफलपछि सहमति जुटेको हो।
मेयर साम्पाङ, वडा अध्यक्षहरू, कार्यपालिका सदस्यहरू, प्राविधिक कर्मचारी, उपभोक्ता समिति, निर्माण व्यवसायी र स्थानीय बासिन्दाको उपस्थिति रहेको बैठकपछि सार्वजनिक निरीक्षण गरिएको थियो।
सो क्रममा सम्झौताबमोजिमको म्याटेरियल मूल्य रु. ७ लाख ४१ हजार उपभोक्ता समितिलाई भुक्तानी दिने निर्णय गरिएको छ।
प्राविधिक विवरणअनुसार, ३x१x१ र २x१x१ साइजका गरी कुल १७६ थान तार जाली, ढुङ्गा ढुवानी र अन्य निर्माण सामग्रीको मूल्यांकन गरी कुल लागत रु. १७ लाख ४० हजार २९४ पुगेको थियो।
श्रमदानबाट गरिएको कामको मूल्य झण्डै १० लाख रुपैयाँ बराबर देखिएको छ।
छलफलपछि तयार पारिएको सर्जमिन मुचुल्कामा सबै सरोकारवालाले हस्ताक्षर गरेपछि विवादको गाँठो फुकिएको हो। सोही अवसरमा मेयर साम्पाङले भने, "अब ग्याबिन जालीको विषय अन्त्य भएको छ, अबको प्राथमिकता समावेशी र पारदर्शी ढंगले बजेट निर्माणमा केन्द्रित हुनेछ।"
भुक्तानी प्रक्रिया अड्किएकै कारण अन्य योजनाहरूको फाइल पनि रोकिएको थियो। त्यसलाई अघि बढाउन ग्याबिन जाली प्रकरण समाधान गर्नु अपरिहार्य भएको जनाइएको छ।
स्थानीय युवा व्यवसायी ध्रुव गिरीले मेयर साम्पाङ र वडाध्यक्षहरूको भूमिकाको खुलेर प्रशंसा गर्दै भने, "नयाँ पुस्ताका निर्माण व्यवसायीका लागि यो एक सकारात्मक संकेत हो।"
अन्त्यमा सबै पक्षबीच सहमति जुट्दै भुक्तानीका लागि प्रक्रिया अगाडि बढाउने, सामाजिक सञ्जालमा विवादास्पद सामग्री नहाल्ने लगायतका बुँदामा पनि स्पष्ट सहमति भएको हो।
