_1693980289.gif "#")
धरान/सुनसरीको धरान उपमहानगरपालिका–५ स्थित झर्नाचोकमा डेरा गरी बस्दै आएका एक युवकको कोठाबाट ठूलो परिमाणमा लागुऔषध फेला परेको छ।
इलाका प्रहरी कार्यालय धरान र अस्थायी प्रहरी चौकी देउरालीबाट खटिएको संयुक्त प्रहरी टोलीले १९ वर्षीय सुदीप उर्फ मुन्सन राईको कोठामा खानतलासी गर्दा लागुऔषध लुकाइ राखिएको अवस्थामा फेला पारेको हो।
धरान–५ देउरालीचोक घर भई हाल कला खत्रीको घरमा डेरा गरी बस्ने राईको कोठाबाट झोलामा लुकाइ राखिएको अवस्थामा ट्रामाडोल ८ हजार ८७६ क्याप्सुल, मिफेनिक स्पास ७ हजार ८९० ट्याब्लेट, नाइट्राजेपाम २० ट्याब्लेट, स्पारेष्ट २९५ ट्याब्लेट र कोलिवन ३१२ ट्याब्लेट बरामद गरिएको प्रहरीले जनाएको छ।
गोप्य सूचनाका आधारमा सोमबार राति १० बजेपछि गरिएको कारबाहीमा उक्त लागुऔषधसहित राईलाई नियन्त्रणमा लिइएको र घटनासम्बन्धी थप अनुसन्धान भइरहेको इलाका प्रहरी कार्यालय धरानले जानकारी दिएको छ।
