सरकारी बीमाले औषधि व्यवसाय चौपट

धरान/ नेपाल सरकारद्वारा सञ्चालनमा ल्याइएको स्वास्थ्य बीमा कार्यक्रमका कारण धरानलगायतको निजी औषधि व्यवसाय धरासायी बन्दै गएको औषधि व्यवसायीहरुले गुनासो गरेका छन्।

नेपाल औषधि व्यवसायी संघ, सुनसरीद्वारा इटहरीस्थित होटल गंगा जमुनामा आयोजना गरिएको अन्तरक्रिया कार्यक्रममा सहभागी व्यवसायीहरुले स्वास्थ्य बीमा नीतिले खुद्रा तथा थोक औषधि व्यवसायमा प्रत्यक्ष असर पारिरहेको बताएका हुन्।

कार्यक्रममा बोल्दै संघका महासचिव नविनराज गौतमले सरकारको वर्तमान बीमा नीतिका कारण औषधि व्यवसाय नै धरापमा पर्ने खतरा देखिएको बताए। "सरकार पूर्वाग्रही ढंगले केवल ठूला अस्पताल र चुनिएका फार्मेसीहरूमा मात्रै बीमा लागू गरिरहेको छ, जसले बाँकी व्यवसायीहरूलाई संकटमा पारेको छ," उनले भने।

संघका अध्यक्ष दीपेन्द्रकुमार साहले सुनसरी जिल्लामा सक्रिय व्यवसायीहरूबीच देखिएको समस्याको समाधान खोज्न थोक व्यापारीहरूसँग अन्तरक्रिया कार्यक्रमको आयोजना गरिएको जानकारी दिए।

संघमा एक सय व्यवसायी दर्ता भए पनि कार्यक्रममा ५० जना मात्रै सहभागी थिए। सहभागी व्यवसायीहरुले अस्वस्थ प्रतिस्पर्धा बढेको, कारोबारमा कमी आएको, साथै बीमा लागु भएका फार्मेसीहरूले कम्पनी वा आयातकर्तामार्फत सिधै औषधि खरिद गर्ने प्रवृत्तिले थोक व्यापारी थप संकटमा परेको गुनासो गरेका थिए।