-फइल तस्बिर
मोरङ।मोरङको सुनवर्षी नगरपालिका–७ बाट प्रहरीले ठूलो परिमाणमा लागुऔषध गाँजा बरामद गरेको छ।
इलाका प्रहरी कार्यालय रंगेलीबाट खटिएको प्रहरी टोलीले विशेष सूचनाको आधारमा बुधवार बिहान करिब ३:१५ बजे उक्त गाँजा बरामद गरेको हो।
मोरङ जिल्ला प्रहरी कार्यालयका प्रवक्ता डीएसपी वेदप्रकाश जोशीका अनुसार, ७ वटा बोरामा प्याक गरिएको अवस्थामा जम्मा ३ सय किलो गाँजा फेला परेको छ।
बरामद गरिएको गाँजा इलाका प्रहरी कार्यालय रंगेलीमा राखिएको छ र घटनाबारे थप अनुसन्धान अगाडि बढाइएको प्रहरीले जनाएको छ।
गाँजाको ओसारपसार र कारोबारमा संलग्न व्यक्ति भने घटनास्थलबाट फरार रहेको र उनीहरूको खोजी तीव्र पारिएको डीएसपी जोशीले जानकारी दिए।
