मोरङ/ मोरङको ग्रामथान गाउँपालिकामा मोटरसाइकलको ठक्करबाट गम्भीर घाइते भएकी ७० वर्षीया वृद्धाको उपचारका क्रममा मृत्यु भएको घटनामा फरार चालक १६ दिनपछि पक्राउ परेका छन्।
ग्रामथान गाउँपालिका–५ तेतरिया चोकस्थित विराटचोक–घिनाघाट सडकखण्डमा असोज २४ गते साँझ करिब ७ बजे उत्तरबाट दक्षिणतर्फ जाँदै गरेको मोटरसाइकलले बाटो काट्दै गरेकी स्थानीय ७० वर्षीया नरमाया त्रिताललाई ठक्कर दिएको थियो।
ठक्करबाट गम्भीर घाइते भएकी त्रितालको उपचारका क्रममा असोज २५ गते बिहान करिब ४ बजे मृत्यु भएको प्रहरीले जनाएको छ।
घटनापछि मोटरसाइकलसहित फरार भएका चालकको खोजीमा इलाका प्रहरी कार्यालय बेलबारी र प्रहरी चौकी तेतरियाबाट संयुक्त प्रहरी टोली खटिएको थियो।
घटनास्थल वरपर जडान गरिएका सीसीटीभी क्यामेराको फुटेजका आधारमा प्रहरीले ठक्कर दिने मोटरसाइकल र चालकको पहिचान गरेको थियो।
प्रहरीका अनुसार को ३९ प ३४६ नम्बरको पल्सर मोटरसाइकल चालक ग्रामथान गाउँपालिका–३ सिद्राहा झोसटोलका २६ वर्षीय अभिषेक कुमार माझी रहेका छन्।
उनलाई कात्तिक ९ गते दिउँसो करिब ३ः३० बजे आफ्नै घरबाट पक्राउ गरिएको हो।
प्रहरीले दुर्घटनामा संलग्न मोटरसाइकलका विभिन्न भाग फुटेको र कुच्चिएको अवस्थामा फेला पारेको जनाएको छ।
पक्राउ परेका माझीलाई मोरङ जिल्ला अदालतबाट पाँच दिनको म्याद थप गरी थप अनुसन्धान भइरहेको प्रहरीले जनाएको छ।
