इलाम/ इलामको माङसेबुङ गाउँपालिका–५ मा जङ्गली च्याउ खाँदा एकै परिवारका तीनजनाको ज्यान गएको छ। मृतकहरूमा ५५ वर्षीय अमर लावती, २५ वर्षीया मनिषा लिम्बू र १७ वर्षीया नुमा लावती रहेका छन्।
झापाको बिर्तामोडस्थित बीएनसी अस्पतालका सूचना अधिकारी डा. अनुपम घिमिरेका अनुसार करिब ६ दिनअघि चिया बगान क्षेत्रमा उम्रिएको जङ्गली च्याउको तरकारी खाएपछि उनीहरू बिरामी परेका थिए।
मनिषा र नुमाको उपचारका क्रममा विराटनगरको विराट नर्सिङ होममा पहिल्यै मृत्यु भइसकेको थियो भने अमर लावतीको आज बीएनसी अस्पतालमा निधन भएको हो।
हरेक वर्षायाममा यस्ता विषालु च्याउ खाँदा अकालमा ज्यान जाने घटना दोहोरिँदै आएको छ। जडीबुटी तथा वनस्पति विज्ञ डा. मित्र पाठकका अनुसार नेपालमा पाइने झन्डै १,३०० प्रजातिका च्याउमध्ये करिब १०० प्रजाति विषालु हुने गरेका छन्।
डा. पाठकका अनुसार च्याउ हेरेर मात्र विषालु हो कि होइन भन्न सकिँदैन। तर, किरा नलागेको, नमिठो गन्ध आउने, रङ्गीचङ्गी, झुस धेरै भएको, भाँच्दा दूध वा चोप निस्कने, छातामा काँडा वा गिर्खा हुने, डाँठमा औँठी हुने तथा फेदमा थैलो वा कचौराजस्तो भाग देखिने च्याउ विषालु हुनसक्ने खतरा हुन्छ।
“राम्रोसँग नचिनिकन जङ्गली च्याउ नखानु नै उत्तम हो,” डा. पाठकले सुझाव दिएका छन्।
