_1693980289.gif "#")
फाइल तस्बिर
सुनसरी/ सुनसरीको बराहक्षेत्र नगरपालिका–३ मा लागुऔषध गाँजाको ओसारपसारमा संलग्न समूहलाई नियन्त्रणमा लिन खोज्दा प्रहरीले गोली चलाएको छ। घटनामा एक जना घाइते भएका छन्।
कोशी प्रदेश प्रहरी प्रमुख डीआईजी ईश्वर कार्कीका अनुसार, विशेष सूचनाका आधारमा गएको प्रहरी टोलीलाई नियन्त्रणको प्रयासकै क्रममा ती समूहका एक सदस्यले प्रहरीमाथि खुकुरी प्रहार गर्ने प्रयास गरेका थिए।
“स्थिति नियन्त्रणबाहिर जान थालेपछि प्रहरीले पहिलो चरणमा दुई राउन्ड हवाई फायर गर्यो। तर आक्रमण नरोकिएपछि आत्मरक्षाका लागि गोली चलाउनु परेको हो,” डीआईजी कार्कीले बताए।
प्रहरीको गोलीबाट बराहक्षेत्र–३ निवासी ५५ वर्षीय रामप्रसाद लिम्बू घाइते भएका छन्। उनको खुट्टाको घुँडामुनि गोली लागेको र हाल धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको प्रहरीले जानकारी दिएको छ। घाइते लिम्बूको अवस्था सामान्य रहेको बताइएको छ।
घटनास्थलबाट गाँजा बरामद भएको विषयमा पुष्टि नभइसकेको र घटनाबारे थप अनुसन्धान भइरहेको सुनसरी प्रहरीले जनाएको छ।
