_1693980289.gif "#")
मोरङ/ मोरङको कानेपोखरी गाउँपालिका–७ स्थित पूर्व–पश्चिम राजमार्गमा सोमबार दिउँसो प्रदेशसभा सांसदहरू चढेको कार र प्रहरीको डीएसपीले चलाएको अर्को कार एकआपसमा ठोक्किएर दुर्घटना भएको छ।
झापाबाट विराटनगर आउँदै गरेको बा ५ च ३५३० नम्बरको कार र झापातर्फ गइरहेको बी एई १४०६ नम्बरको कार दिउँसो २ बजेतिर ठोक्किएका हुन्।
बी एई १४०६ नम्बरको कारमा कोशी प्रदेशसभा सदस्यहरू मैयाँ श्रेष्ठ लावती (नेपाली कांग्रेस) राधाकृष्ण खनाल (एमाले), नम्बरलाल धिमाल (एमाले) र विद्या चाम्लिङ (नेकपा एकीकृत समाजवादी) सवार थिए। उनीहरू प्रदेशसभा बैठकमा सहभागी हुन विराटनगर जाँदै थिए।
दुर्घटनाको समयमा सांसद सवार कार झापाको दमक–१ निवासी ४० वर्षीय भेषराज श्रेष्ठले चलाइरहेका थिए।
अर्को कार, बा ५ च ३५३०, झापा प्रहरीका प्रवक्ता डीएसपी खगेन्द्रबहादुर खड्काले चलाएका थिए।
उनी विराटनगरस्थित घरबाट आफ्नो कार्यक्षेत्र झापा फर्किंदै गर्दा यो घटना भएको हो।
इलाका प्रहरी कार्यालय पथरीका इन्स्पेक्टर खगेन्द्र एक्तेनको नेतृत्वमा प्रहरी टोली घटनास्थलमा पुगेको थियो।
मोरङ प्रहरीका प्रवक्ता डीएसपी वेदप्रकाश जोशीका अनुसार दुवै सवारीमा सामान्य क्षति पुगेको छ र घटनाबारे थप अनुसन्धान भइरहेको छ।
सौभाग्यवश, दुर्घटनामा कुनै मानवीय क्षति नभएको प्रहरीको भनाइ छ।
