झापा/झापा जिल्लाको अर्जुनधारा नगरपालिका–५ स्थित बिरिङ खोलामा दुई वर्षअघि बाढीले भासिएको पक्की पुल अझै पुनर्निर्माण हुन सकेको छैन।
स्थानीय सरकारदेखि संघीय तहसम्मको बेवास्ता र ढिलासुस्तीकै कारण सो पुल अलपत्र अवस्थामा रहेको छ। जोखिम मोलेर दैनिक ओहोरदोहोर गर्न बाध्य स्थानीयवासी अब सरकारको उदासीनताप्रति खुलेर आक्रोशित छन्।
विर्तामोड–अर्जुनधारा हुँदै इलामको माइ नगरपालिकालाई जोड्ने सो पुल अत्यन्तै महत्त्वपूर्ण भए पनि संरचना भत्किएपछि सरकारले हालसम्म नयाँ पुल निर्माणका लागि ठोस पहल गर्न सकेको छैन।
अहिले पनि साना सवारी साधनले मात्र पुल प्रयोग गरिरहेकाले यात्रु र चालकहरू दिनहुँ जोखिम बेहोर्न बाध्य छन्।
स्थानीय मेघराज रम्तेल भन्छन्, “पहिलो वर्ष त बजेट थिएन होला भनेर सह्य गर्यौँ, तर दोस्रो वर्ष पनि सरकारले सुनुवाइ नगरेपछि अब साँच्चिकै त्रास बढेको छ।” बर्खायाममा त खोलाको पानी पुलभन्दा माथि पुग्ने हुँदा दुर्घटनाको खतरा झन् बढेको उनी बताउँछन्।
