_1693980289.gif "#")
पाँचथर/ तमोर करिडोरअन्तर्गत पाँचथर–ताप्लेजुङ सडकखण्ड फेरि अवरुद्ध भएको छ। शुक्रबार बिहान आएको बाढीले वैकल्पिक रूपमा राखिएका ह्युम पाइपहरू बगाएपछि सडक सञ्चालन ठप्प भएको हो।
पहिल्यै बेलिब्रिज बगाएपछि हेवां खोलामा असोज १२ गतेदेखि ह्युम पाइप राखेर डाइभर्सनमार्फत यातायात सञ्चालनमा ल्याइएको थियो। तर, नयाँ बाढीले ती पाइपहरू बगाएपछि यातायात पूर्णरूपमा अवरुद्ध भएको छ।
फिदिम र हिलिहाङ गाउँपालिकाको सिमानामा पर्ने खोलाको डाइभर्सन बगाएपछि सवारीसाधनलाई लामो घुमाउरो बाटो प्रयोग गर्नुपर्ने अवस्था आएको स्थानीय राम माझीले जानकारी दिए।
तमोर करिडोर आयोजनाका प्रमुख प्रदीप निरौलाले स्कावेटरको सहयोगमा ह्युम पाइपहरू तानेर मर्मत गरी आवागमन पुनः सुचारु गर्ने प्रयास भइरहेको बताए।
“निर्माण कम्पनीसँग समन्वय गरेर मनसुन सकृय नहुँदासम्म डाइभर्सनमार्फत नै यातायात सञ्चालनमा ल्याउने पहल गरिरहेका छौं,” उनले भने।
स्थानीयबासी र यात्रुहरूका लागि यसपटकको अबरुद्धता थप समस्याको रूपमा देखिएको छ, किनकि यो सडक पूर्वी पहाडी जिल्ला ताप्लेजुङलाई तराई तथा अन्य भूभागसँग जोड्ने प्रमुख मार्ग हो।
