प्रतिनिधि तस्बिर
काठमाडौं/ काठमाडौंको बागबजारस्थित एक गेस्ट हाउसमा युवतीको बलात्कारपछि हत्या गरिएको अभियोगमा एक जना भारतीय भूपू सैनिक पक्राउ परेका छन्।
पक्राउ परेका व्यक्ति रामचन्द्र पन्त रहेको काठमाडौं प्रहरी परिसरले जनाएको छ।
गत चैत ११ गते बागबजारको एक गेस्ट हाउसको कोठामा एक विवाहित युवती मृत अवस्थामा फेला परेकी थिइन्। प्रारम्भिक अनुसन्धानपछि उनको बलात्कारपछि हत्या भएको पुष्टि भएको प्रहरीले जनाएको छ।
घटनापछि फरार रहेका पन्तलाई प्रहरीले पक्राउ गरेको हो। उनी घटना बेलामा मृतक युवतीसँगै सोही गेस्ट हाउसमा बसेका थिए।
पोष्टमार्टम रिपोर्टमा बलात्कारपछि हत्या भएको देखिएपछि अनुसन्धान तीव्र बनाइएको र विभिन्न प्रमाणका आधारमा पन्तलाई पक्राउ गरिएको प्रहरीले जानकारी दिएको छ।
प्रहरीले घटनाबारे थप अनुसन्धान जारी रहेको जनाएको छ।
