स्कारपियो दुर्घटनामा एकको ज्यान गयो, छ जना घाइते

उदयपुर/ उदयपुरको कटारी नगरपालिका–६ स्थित मदन भण्डारी लोकमार्गमा स्कारपियो दुर्घटना हुँदा एक जनाको मृत्यु भएको छ भने छ जना गम्भीर घाइते भएका छन्।

बैशाख १८ गते अपराह्न चितवनबाट झापा जाँदै गरेको मे १ च ३०४० नम्बरको स्कारपियो आफैं अनियन्त्रित भई सडक किनारमा रहेको फलामको बेरियरमा ठोक्किँदा दुर्घटना भएको हो।

दुर्घटनामा परेका घाइतेहरूमध्ये झापा दमक नगरपालिका–३ का ५५ वर्षीय माधव बस्नेतलाई तत्कालै प्रहरी र स्थानीयको सहयोगमा उद्धार गरी कटारी अस्पताल लगिएको थियो। तर अस्पताल पुर्‍याउनासाथ नै चिकित्सकले उनलाई मृत घोषणा गरे।

घटनामा अन्य छ जना घाइते भएका छन्। घाइतेमध्ये दमक–१० का ४९ वर्षीय राजेन्द्र प्रसाद भण्डारी, दमक–१ का ४५ वर्षीय ज्ञानेन्द्र गौतम, दमक–६ का ५४ वर्षीय कमल श्रेष्ठ, दमक–२ का ३८ वर्षीय नवीन खतिवडा र गौरादह नगरपालिका–१ का ५४ वर्षीय भुवन दाहाललाई थप उपचारका लागि विराटनगरको न्युरो अस्पताल पठाइएको छ।

गाडी चालक दमक–९ का ३८ वर्षीय देवेन्द्र तामाङलाई उपचारपछि प्रहरीले नियन्त्रणमा लिएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।