सुनसरी/ सुनसरीको हरिनगरा गाउँपालिका–७ मा विवादका क्रममा कटुवा पेस्तोल निकालेर तर्साउन खोज्ने युवकलाई प्रहरीले नियन्त्रणमा लिएको छ। पक्राउ परेका व्यक्ति २५ वर्षीय सजाद अन्सारी हुन्।
जिल्ला प्रहरी कार्यालय सुनसरीका प्रवक्ता डीएसपी योगराज खतिवडाका अनुसार अन्सारीले बिहीबार दिउँसो करिब ३ः३० बजेतिर स्थानीय सारिक जटसँग विवाद भएको बेला पेस्तोल देखाएर धम्क्याउने प्रयास गरेका थिए।
घटना थाहा पाउनासाथ प्रहरी चौकी घुस्की, जिल्ला प्रहरी कार्यालय र सशस्त्र प्रहरी बल बीओपी घुस्कीको संयुक्त टोली परिचालन गरिएको थियो। स्थानीयको सहयोगमा अन्सारीलाई कटुवा पेस्तोलसहित पक्राउ गरिएको खतिवडाले जानकारी दिए।
हाल अन्सारीलाई जिल्ला प्रहरी कार्यालय सुनसरीमा राखिएको छ। उनलाई हातहतियार खरखजना मुद्दामा कारबाही अघि बढाउने तयारी गरिएको छ।
पेस्तोल कहाँबाट ल्याइएको हो र दुई पक्षबीच के कारणले विवाद चर्कियो भन्ने विषयमा थप अनुसन्धान भइरहेको प्रहरीले जनाएको छ।
