-तस्बिर : कोले न्युज
धरान/ धरान उपमहानगरपालिका–१५ नं. वडामा महिलालाई लक्षित गर्दै सेनिटरी प्याड बनाउने सीपमूलक तालिम सम्पन्न गरिएको छ।
महिलाहरूलाई आत्मनिर्भर र घरेलु उद्यमी बनाउन स्थानीय सरकारले अघि सारेको यो प्रयासलाई महिलाहरूले सकारात्मक रूपमा लिएका छन्।
चैत १९ देखि २३ गतेसम्म सुनौलो महिला समाजको सहकार्यमा सञ्चालित पाँचदिने तालिममा वडाभित्रका २० जना महिलाहरूले सहभागिता जनाए।
तालिमको सहजीकरण डम्बरकुमारी मास्केले गर्नुभएको थियो, जो अपांग तथा असहाय वर्गका लागि विगतदेखि सीपमूलक तालिम दिँदै आउनु भएकी अनुभवी प्रशिक्षिका हुन्।
सुनौलो महिला समाजकी अध्यक्ष दिलकुमारी राईका अनुसार, “सेनिटरी प्याड सामान्य लागे पनि महिलाका लागि अत्यावश्यक सामग्री हो।
बजारमा पाइने प्याडमा केमिकल मिसावट हुने भएकाले धरानमै सुरक्षित उत्पादन गर्न तालिम सञ्चालन गरिएको हो।”
१५ नं. वडा अध्यक्ष नरेश इवारमले तालिमपश्चात उत्पादन गरिएका प्याडलाई बजारसम्म पुर्याउने जिम्मा वडा समितिले लिने प्रतिबद्धता जनाए।
कार्यक्रममा धरान उपमहानगरपालिकाकी कार्यपालिका सदस्य सिर्जना नेपाल, हातेमालो समूहकी अध्यक्ष लिला ढकाल, प्रगतिशील नौमति तथा पञ्जेबाजा समूहकी प्रतिनिधिहरू शिव हिरा राई, गीता पोखरेल र अम्बिका राईलगायतको उपस्थिति थियो।
उनीहरूले महिलाहरूलाई व्यवसायिक उत्पादनतर्फ अघि बढ्न हौसला दिँदै बाहिरबाट प्याड ल्याउनु नपर्ने वातावरण बनाउन आग्रह गरे।
धरानमा महिला लक्षित कार्यक्रमहरू भइरहँदा पनि सेनिटरी प्याड उत्पादन तालिम भने निकै कम हुने गरेको पृष्ठभूमिमा आयोजना गरिएको यो तालिमले सहभागी महिलाहरूमा आत्मविश्वास र व्यवसायिक सोच जागृत गराएको छ।
