_1693980289.gif "#")
काठमाडौं/ त्रिभुवन विश्वविद्यालय (त्रिवि) अन्तर्गत मंगलबार (चैत ५ गते) हुने स्वतन्त्र विद्यार्थी युनियन (स्ववियु) निर्वाचन अघि नै देशभरका ९० कलेजमा सर्वसम्मत रूपमा नेतृत्व चयन भइसकेको छ।
तर, त्रिवि केन्द्रीय क्याम्पससहित १६ वटा आंगिक क्याम्पसमा भने विभिन्न विवादका कारण निर्वाचन स्थगित भएको छ।
त्रिवि खेलकुद तथा विद्यार्थी कल्याण निर्देशनालयका निर्देशक प्राध्यापक पशुपति अधिकारीका अनुसार ४८ आंगिक र साढे तीन सयभन्दा बढी सम्बन्धन प्राप्त कलेजमा निर्धारित मितिमा निर्वाचन हुनेछ।
काठमाडौंको महेन्द्ररत्न क्याम्पसमा विद्यार्थीहरू निर्वाचन व्यवस्थित र शान्तिपूर्ण रूपमा सम्पन्न गराउने विषयमा छलफलमा व्यस्त देखिएका छन्।
कहाँ-कहाँ निर्वाचन अवरुद्ध?
त्रिवि केन्द्रीय क्याम्पस कीर्तिपुर, त्रिचन्द्र क्याम्पस, नेपाल ल क्याम्पस, शंकरदेव कलेज, थापाथली कलेज, आयुर्वेद कलेज, सरस्वती बहुमुखी कलेज, विश्वभाषा क्याम्पस, पब्लिक युथ कलेज, जनकपुरको रामस्वरूप रामसागर बहुमुखी क्याम्पस, पश्चिमाञ्चल इन्जिनियरिङ कलेज, डिग्री क्याम्पस विराटनगर, महेन्द्र मोरङ कलेज, सिद्धबाबा कलेज, सुर्खेत बहुमुखी कलेज र बुटवल बहुमुखी कलेजमा निर्वाचन प्रक्रिया अवरुद्ध भएको छ।
त्रिवि केन्द्रीय क्याम्पस कीर्तिपुरमा चार विद्यार्थी संगठन – नेविसंघ, नयाँ शक्ति विद्यार्थी युनियन, राष्ट्रिय प्रजातान्त्रिक विद्यार्थी संगठन र अनेरास्ववियु (क्रान्तिकारी) ले निर्वाचन समितिको कार्यकक्षमा तालाबन्दी गरेका छन्।
उनीहरूले समितिले मनोनयन दर्तामा पूर्वाग्रही भूमिका खेलेको आरोप लगाएका छन्।
त्रिचन्द्र क्याम्पसमा १६ वर्षपछि निर्वाचन
नेपालकै पुरानो त्रिचन्द्र कलेजमा १६ वर्षपछि स्ववियु निर्वाचन हुन लागेको छ। २०६५ सालपछि लगातार विवादका कारण रोकिएको निर्वाचनलाई यसपटक सम्पन्न गराउन निर्वाचन आयोगले ठोस निर्णय लिएको हो।
नेविसंघका तीन बागी उम्मेदवारसहित ९ जनाले स्ववियु सभापतिमा उम्मेदवारी दिएका छन्।
सर्वसम्मत नेतृत्व चयन भएका कलेजहरू
स्ववियु निर्वाचनका लागि ९० कलेजमा सर्वसम्मत रूपमा सभापति चयन भएको छ।
सामाजिक सञ्जालको प्रयोग
यस पटकको निर्वाचन प्रचारमा सामाजिक सञ्जालको व्यापक प्रयोग गरिएको छ।
उम्मेदवारहरूले फेसबुक, एक्स (ट्विटर) र टिकटकमार्फत मतदातासँग सम्पर्क गरेका छन्। महेन्द्ररत्न क्याम्पसका स्ववियु उम्मेदवार ईश्वर थापाका अनुसार, “कम खर्चमा चुनाव जित्ने प्रभावकारी माध्यम सामाजिक सञ्जाल बनेको छ, जसले विद्यार्थीहितमा काम गर्ने उत्साह बढाएको छ।”
त्रिवि अन्तर्गतको स्ववियु निर्वाचनमा हालसम्मको अवस्था हेर्दा कतै शान्तिपूर्ण त कतै विवादग्रस्त देखिएको छ।
त्रिवि प्रशासनले विवाद समाधान गरी निर्वाचन प्रक्रिया अघि बढाउने प्रयास गरिरहेको जनाएको छ।
