_1693980289.gif "#")
-भगीरथ भण्डारी
इलाम/ निर्वाचनका बेला नेताहरूले दिएका आश्वासन खोक्रा सावित भइरहेका छन्।
इलामको फाकफोकथुम गाउँपालिका-३, सल्लेरीका बासिन्दा आठ वर्षदेखि खानेपानीको समस्याले जुधिरहेका छन्, तर समाधानको कुनै ठोस योजना देखिएको छैन। स्थानीय तह, प्रदेश, र सङ्घीय सरकार गठन भइसके पनि यहाँका जनता अझै खोल्सा-खोल्सीको पानीमै भर पर्न बाध्य छन्।
'पहिले खानेपानी समस्या समाधान गर्छौं' भन्दै भोट मागे, तर...
२०७९ सालको स्थानीय निर्वाचनका बेला उम्मेदवारहरू गाउँघर डुल्दै, "पहिले खानेपानीको समस्या समाधान गर्छौं" भन्दै भोट माग्न पुगेका थिए। मतदाताले विश्वास गरेर जिताए पनि चुनाव जितेको तीन वर्ष बित्न लाग्दा समेत खानेपानीको समस्या जस्ताको त्यस्तै छ।
सल्लेरीमा बसोबास गर्ने ९० घरपरिवार अहिले पनि कुवा बारेर खानेपानी संकलन गर्न बाध्य छन्। ती कुवामा पनि पानीको मात्रा न्यून हुँदा दैनिक मुहानसम्म पुग्नुपर्ने बाध्यता छ। स्थानीय वेद प्रसाद पाण्डे भन्छन्, "मुहानमा पानी आएन भने कुवाबाट गाग्रीभरि पानी ल्याउनैपर्छ।"
व्यक्तिगत प्रयासबाट पानी त ल्याए, तर...
सल्लेरीकै सन्त लुङ्गेलीले २० एमएमको एक क्वायल पाइप व्यक्तिगत रूपमा किनेका थिए। निकै टाढाबाट पानी ल्याउन सफल भए पनि अहिले मर्मत गर्न सकस छ। पृथ्वी प्रसाद भण्डारी भन्छन्, "बिहान-बेलुका बाल्टी बोकेर पानी लिन जानुपर्छ। कहिलेकाहीँ नजिकको धारामा आउँछ, कहिलेकाहीँ निकै टाढाबाट ल्याउनुपर्छ।"
यस्तै समस्या आमचोकको बजार र खत्री गाउँका बासिन्दाले पनि भोगिरहेका छन्। यहाँका धेरै परिवारले गाग्री बोकेर टाढाटाढाबाट पानी ल्याउनुपर्छ।
"हामीलाई बिर्से नेताहरू, खानेपानी परियोजना खोइ?"
स्थानीय रमेश गिरी भन्छन्, "चुनावको बेला नेताहरू ठूल्ठूला सपना देखाउँछन्। खानेपानी समस्या हल गर्छौं भनेका थिए, तर अहिले कुनै चासो छैन। अब समाधान हुन्छ भन्ने आसै मरेको छ।"
केही पहल भए पनि घरघरमा पानी पुर्याउने योजना अधुरै
फाकफोकथुम गाउँपालिका-३ का वडाध्यक्ष दीपेन्द्र लिम्बु भने खानेपानीको समस्या समाधानका लागि काम सुरु भइसकेको बताउँछन्।
तर, स्थानीयको गुनासो छ— योजना सुन्ने त धेरै सुनियो, तर पानी अहिलेसम्म पाइएन।
विद्यालयमा पनि पानी छैन, विद्यार्थी गाग्री बोकेर हिँड्ने बाध्यता
सल्लेरी प्राथमिक विद्यालयमा कक्षा ५ सम्म पढाइ हुन्छ, तर खानेपानी अभाव छ। विद्यार्थीले घरबाटै पानी बोकेर ल्याउनुपर्ने बाध्यता छ। टिफिन समयमा पाँच-१० मिनेट हिँडेर पानी ल्याउन जानुपर्ने अवस्था छ। विद्यालयमा धारा भए पनि पानी नआउँदा विद्यार्थी र शिक्षक सबैलाई असहज भएको छ।
आठ वर्षदेखि सल्लेरीका बासिन्दा खानेपानी समस्याबाट पिल्सिएका छन्। नेताहरूले पटक-पटक आश्वासन दिए पनि योजनाहरू कागजमै सीमित छन्।
अब स्थानीय सरकार र जनप्रतिनिधिले साँच्चिकै पहल गर्छन् कि फेरि अर्को चुनाव कुर्नुपर्छ? सल्लेरीका जनता जवाफ खोजिरहेका छन्।
