चतरा/ वराहक्षेत्र नगरपालिकामा जारी तेस्रो संस्करणको वडा स्तरीय "वराहक्षेत्र मेयर लिग कप रनिङ्ग शिल्ड" फुटबल प्रतियोगिता अन्तर्गत बुधवार सम्पन्न खेलहरूमा वडा नं. ५ र वडा नं. ४ विजयी भएका छन्।
पहिलो खेलमा वडा नं. ५ ले वडा नं. १० लाई १-० गोल अन्तरले पराजित गर्दै लगातार दोस्रो जित दर्ता गर्यो।
यो जितसँगै वडा नं. ५ ले ६ अंक जोड्दै लिग तालिकामा बलियो स्थान बनाएको छ। निर्णायक गोल गरेका अर्जुन कुवर म्यान अफ द म्याच घोषित भए, जसले नगद २,१०० रुपैयाँ र ट्रफी प्राप्त गरे।
त्यस्तै, बुधवारकै दोस्रो खेलमा वडा नं. ४ ले वडा नं. ११ लाई १-० गोल अन्तरले पराजित गर्यो।
यो जितसँगै वडा नं. ४ ले प्रतियोगितामा पहिलो ३ अंक जोड्न सफल भयो, भने लगातार दुई खेलमा पराजित भएपछि वडा नं. ११ प्रतियोगिताबाट बाहिरियो। निर्णायक गोलकर्ता दिपक तामाङ्ग म्यान अफ द म्याच घोषित भए र उनले पनि २,१०० रुपैयाँ नगद र ट्रफी प्राप्त गरे।
लिग फर्म्याटमा चलिरहेको प्रतियोगिताअन्तर्गत बिहीबारको पहिलो खेल वडा नं. ७ र वडा नं. ९ बीच तथा दोस्रो खेल वडा नं. ३ र वडा नं. ८ बीच हुनेछ।
नगर खेलकुद विकास समितिको आयोजनामा वराहक्षेत्र नगरपालिका वडा नं. ७, देबिघाटस्थित बसन्त ऋतु माध्यमिक विद्यालयको खेलमैदानमा जारी प्रतियोगिता "खेलकुद हाम्रो सान, खेलाडी उत्पादन गर्ने हाम्रो अभियान" भन्ने नाराका साथ सञ्चालन भइरहेको छ।
