धरान/ उच्च शिक्षाका लागि बर्सेनि लाखौं नेपाली विद्यार्थी विदेशिनु गम्भीर चिन्ताको विषय बनेको छ।
अभिभावक, शिक्षकदेखि सरकारका नीति निर्मातासम्मले यसलाई गम्भीर रूपमा लिँदै आएका छन्।
मंगलबार धरान-१६ स्थित लिगामेन्ट रेसिडेन्सियल स्कुलको ११औं अभिभावक दिवसमा पनि यही विषय प्रमुख बहसको केन्द्र रह्यो।
कार्यक्रमको उद्घाटन गर्न पुगेका कोशी प्रदेशका भौतिक पूर्वाधार विकास तथा स्वास्थ्य मन्त्री भुपेन्द्र राईले विद्यार्थी विदेशिनु नेपालका लागि दुर्भाग्यपूर्ण रहेको बताए। उनले अभिभावकलाई आफ्ना सन्तानलाई स्वदेशमै अध्ययन गराउन प्रेरित गर्न आग्रह गरे।
उनका अनुसार, खाडी, युरोप र अन्य मुलुकतर्फ युवापुस्ताको पलायन तीव्र भएपछि नेपालमा युवा शक्तिको खडेरी पर्न थालेको छ।
शिक्षा, विज्ञान तथा प्रविधि मन्त्रालय अन्तर्गत वैदेशिक अध्ययन अनुमति शाखाका अनुसार, पछिल्लो १० वर्षमा ६ लाख ३९ हजार भन्दा बढी विद्यार्थी विदेश गइसकेका छन्।
पछिल्ला तीन वर्षमा मात्रै हरेक वर्ष एक लाखभन्दा बढीले विदेशमा अध्ययन गर्न एनओसी लिएको तथ्यांक देखिन्छ।
विद्यार्थी पलायन रोक्न सरकारले ठोस नीति ल्याउनुपर्ने र अभिभावकहरूले पनि दीर्घकालीन असरबारे सचेत हुनुपर्ने मन्त्री राईले जोड दिए। नेपालमै अवसर सिर्जना गर्न सकेमा विद्यार्थीको पलायन रोक्न सकिने उनको धारणा थियो।
अब प्रश्न उठ्छ – के सरकारले अबको पुस्तालाई नेपालमै अध्ययन र अवसरको विश्वास दिलाउन सक्छ?
