प्रतिबन्धित लागूऔषध सहित ४ जना पक्राउ

मोरङ/  इलाम र मोरङका विभिन्न स्थानबाट प्रतिबन्धित लागूऔषधसहित ४ जनालाई प्रहरीले पक्राउ गरेको छ।

माघ ३० गते बिराटनगर महानगरपालिका-१७ स्थित चेकजाँचको क्रममा, इलाका प्रहरी रानी र लागूऔषध नियन्त्रण ब्यूरो बिराटनगरबाट खटिएको प्रहरी टोलीले भारतबाट नेपाल तर्फ आउँदै गरेको ३२ वर्षीय बिजय राईलाई २ ग्राम ब्राउन सुगरसहित पक्राउ गरेको छ। राई मोरङको बेलबारी नगरपालिका-४ का निवासी हुन्।

त्यसै गरी, इलाका प्रहरी कार्यालयबाट खटिएको टोलीले पथरीशनिश्चरे-१ का ३३ वर्षीय बाल कृष्ण परियार र २० वर्षीय मौषम धिमाललाई १०५ चक्की ट्रामाडोलसहित नियन्त्रणमा लिएको छ।

इलामको महमाई प्रहरी चौकीबाट गस्ती टोलीले माई नगरपालिका-७ का ४५ वर्षीय टेक बहादुर लिम्बुलाई ७० मिलिग्राम ब्राउन सुगरसहित पक्राउ गरेको छ।

पक्राउ परेका व्यक्तिहरुका बारेमा थप अनुसन्धान जारी रहेको प्रहरीले जनाएको छ।