वीपी प्रतिष्ठानमा डाक्टरको लापरबाहीले बच्चाको मृत्युः छानबिन गर्न समिति बन्ने

धरान ।उदयपुरको बेलका नगरपालिका ९ का १५ महिने आरोह खड्काको शनिबार डाक्टरको लापरबाहीले मृत्यु भएको आफन्तले बताएका छन् ।

झाडापखालाको समस्या देखिएपछि उपचारका लागि धरानस्थित बीपी कोइराला स्वास्थ्य विज्ञान प्रतिष्ठान ल्याइएका बालकको मृत्यु डाक्टरको लापरबाहीका कारण भएको भन्दै परिवारले गम्भीर आपत्ति जनाएका छन्।

मृतकका पिता मोहन खड्काका अनुसार झाडापखालाको समस्या जारी रहेको जानकारी गराउँदा पनि इमर्जेन्सीमा खटिएका चिकित्सकले बालकको स्वास्थ्य गम्भीर नरहेको भन्दै उपचारमा हेलचेक्र्याइँ गरेका थिए।

चिकित्सकले “बच्चा हाँसिरहेको छ, केही हुँदैन” भन्दै २,४ दिनपछि मात्र ल्याउन सुझाएका थिए। जबर्जस्ती निजी अस्पतालमा लैजान दबाब दिएको र लगातार अनुरोध गर्दा पनि समयमा औषधि नदिइ गलत औषधि दिएको आरोप परिवारले लगाएका छन्।

परिवारको आक्रोश र अस्पताल प्रशासनको प्रतिक्रिया
बालकको असामयिक मृत्यु भएपछि शोकाकुल परिवार र आफन्तले अस्पताल प्रशासनसँग जवाफ मागेका थिए। घटनाप्रति गम्भीर ध्यानाकर्षण गर्दै प्रतिष्ठानका निर्देशक डा। जगत नारायणले दोषी चिकित्सकविरुद्ध कानुनी कारबाही गर्ने प्रतिबद्धता जनाएका छन्।

उनले आइतबार पीडित परिवारसहितको सहभागितामा छानबिन समिति गठन गरिने र दोषीलाई कारबाहीको दायरामा ल्याइने बताएका छन्।

लापरबाहीमाथि गम्भीर प्रश्न
झाडापखालाका कारण अस्पतालमा ल्याइएका बालकको समयमा उपचार नहुनु र चिकित्सकले पेसागत दायित्वप्रति देखाएको लापरबाहीप्रति गम्भीर प्रश्न खडा भएको छ। पीडित परिवारले छानबिनलाई निष्पक्ष बनाउन र दोषीलाई कडा कारबाही गर्न माग गरेका छन्।

सार्वजनिक चासो
स्वास्थ्य सेवामा देखिएको यस्तो लापरबाहीले सर्वसाधारणको अस्पतालप्रतिको विश्वासमा आँच पु¥याएको छ। यो घटना पेसागत नैतिकता र उत्तरदायित्वबारे थप संवाद र सुधारको आवश्यकता औंल्याउने एउटा गम्भीर उदाहरण बनेको छ।