कोशीमा भीषण बर्षा,सुनसरी सहित ११ जिल्ला रेडअर्लटमा "जिप्रका सुनसरीको आकस्मिक बैठक , सबै संयन्त्र तैनाथ "

धरान । अत्यधिक गर्मीसँग मंगलबार बेलुकी पखदेखि पानी परेर जनजीवन प्रतिकुल भएको अवस्था भीषण पानी पर्ने मौसमविदहरुले अनुमान गरेका छन् ।
मौसम पूर्वानुमान महाशाखाले बुधबार विशेष बुलेटिन जारी गर्दै आइतबार बिहानसम्म सातवटै प्रदेशमा भीषण वर्षा हुने अनुमान गर्दै सचेत रहन आग्रह पनि गरेको छ । मनसुनी प्रणालीका कारण बिहीबार दिउँसोबाट देशभर भीषण वर्षा हुने भएको छ।

कोशी, बागमती, गण्डकी र लुम्बिनीका धेरै स्थान तथा मधेश, कर्णाली र सुदूरपश्चिमका केही स्थानमा भीषणदेखि अत्यधिक वर्षाको सम्भावना छ।

कोशीमा , झापा, मोरङ, सुनसरी, धनकुटा, तेह्रथुम, खोटाङ, ओखलढुंगा, उदयपुर, भोजपुर, इलाम र पाँचथर रेडअलर्टमा रहेको छ ।तराईमा हावाहुरीको समेत चेतावनी दिइएको छ।जिल्ला प्रशासन कार्यालय सुनसरीले पनि भीषण वर्षाको समयमा हुने जोखिमबाट बँच्न र बचाउनको लागि जिल्लाबासीलाई सचेत रहन आग्रह गरेको छ ।

प्रमुख जिल्ला अधिकारी रामचन्द्र तिवारीले कोशी पत्रको टेलिफोन बार्तामा आग्रह गरेका छन् । प्रमुख जिल्ला अधिकारी तिवारीका अनुसार जिप्रका सुनसरीको आकस्मिक बैठक बुधबार दिउँसो वसेर पूर्ब तयारी गरेको वताइएको छ ।नागरिकले आपतकालिन अबस्थामा प्रहरी, जनप्रतिनिधी र स्थानीय सरकारलाई जानकारी गराउन अनुरोध  गरेको छ । 

महाशाखाले सोमबार राति विशेष बुलेटिन जारी गर्दा बिहीबारदेखि शनिबार सम्मका लागि २७ जिल्लामा रेडअलर्ट जारी गरेको थियो।तर, वर्षा गराउने प्रणाली नेपाल नजिक झन शक्तिशाली बनेकाले वर्षा हुने क्षेत्र र असर बढी पर्ने देखिएको मौसम पूर्वानुमान महाशाखाका मौसमविद् प्रतिभा मानन्धरले बताइन्।

महाशाखाका अनुसार बंगालको खाडीबाट प्रवाह हुने जलवाष्पयुक्त हावा र त्यस क्षेत्रमा बनेको न्यूनचापीय प्रणालीका कारण बिहीबारदेखि आइतबार बिहानसम्म अधिकांश स्थानमा मेघ गर्जन, चट्याङसहित हल्कादेखि मध्यम वर्षाको सम्भावना छ।

कुनबार कस्तो बर्षा ?
मौसम विभागका अनुसार बिहीबार दिउँसोदेखि देशभर हल्कादेखि मध्यम वर्षाको सम्भावना छ।

कोशी, बागमती, गण्डकी तथा लुम्बिनीका थोरै स्थान तथा मधेशका एक–दुई स्थानमा भीषणदेखि अत्यधिक वर्षाको चेतावनी दिइएको छ। तराईमा हावाहुरी चल्नेछ।शुक्रबार पनि देशभर वर्षा हुनेछ। कोशी, बागमती, गण्डकी, लुम्बिनी, सुदूरपश्चिम र कर्णालीका केही स्थान तथा मधेशका थोरै स्थानमा भीषणदेखि अत्यधिक वर्षाको सम्भावना छ।

तराईमा हावाहुरीको समेत सम्भावना छ। गण्डकी, लुम्बिनी, कर्णाली र सुदूरपश्चिमका एक–दुई स्थानमा अत्यधिक वर्षाको चेतावनी दिइएको छ।अधिकांश स्थानमा वर्षा हुनेछ। बागमती, गण्डकी, लुम्बिनी र कर्णालीका केही स्थान तथा बाँकी प्रदेशका थोरै स्थानमा भारीदेखि धेरै भारी वर्षाको समेत सम्भावना छ।

लुम्बिनी, गण्डकी तथा कर्णालीका केही स्थानमा हावाहुरीको समेत सम्भावना र आइतबार बिहानसम्म वर्षा हुनेछ। देशभर हल्कादेखि मध्यम वर्षाको सम्भावना रहे पनि आइतबार दिउँसोदेखि मौसममा सुधार आउने मौसमविद्ले बताएका छन् ।